विकी कौशल बाबा होण्याबद्दल पहिल्यांदाच झाला व्यक्त; म्हणाला, “मी खूप…”

विकी कौशलने बाबा होण्याबद्दलची त्याची उत्सुकता सांगत तो यासाठी किती आनंदी आहे याबद्दल सांगितलं आहे. ‘युवा’शी संवाद साधताना त्यानं तो बाबा होण्यासाठी खूप उत्सुक असल्याचं म्हटलं. विकीला बाबा होण्याबद्दल तुला कोणत्या गोष्टीची जास्त उत्सुकता आहे, असं विचारलं.

बाबा होण्याबद्दल विकी कौशलची प्रतिक्रिया

विकी यावर म्हणाला, “फक्त बाबा होणं हीच. खरंच मी खूप उत्सुकतेनं वाट पाहत आहे. मला वाटतं हा खूप मोठा आशीर्वाद आहे. लवकरच हे होणार आहे. त्यामुळे सकारात्मक विचार करतोय. मला तर असं वाटतंय की, मी घराबाहेर जाणारच नाही.” विकीनं यावेळी इंडस्ट्रीत त्याला १० वर्षं पूर्ण झाल्याबद्दही सांगितलं आहे. विकी म्हणाला, “मी देवाकडे प्रार्थना करतो की, ही फक्त सुरुवात आहे आणि मला अजून खूप काही करायचं आहे. खूप शिकायचं आहे, प्रगती करायची आहे. सगळीकडे आनंद पसरवायचा आहे.”

विकीला पुढे कार्यक्रमात मुलाखतीदरम्यान त्याच्या काही चाहत्यांनीही प्रश्न विचारले. यावेळी त्याला एका चाहतीनं त्याला आजवर विविध भूमिकांतून पाहिलं आहे; पण त्यानं साकारलेली अशी कोणती भूमिका आहे, जी त्याला त्याच्यासारखी वाटतं, असं विचारल्यानंतर तो म्हणाला, “सॅम बहादूर. ते खूप उत्कृष्ट व्यक्तिमत्त्व होतं. त्यांची शिस्तप्रियता, त्यांची मूल्यं सगळंच खूप छान होतं. त्यांच्याकडून खूप शिकण्यासारखं आहे. विकीला त्यानंतर ज्या नवीन मुलांना या इंडस्ट्रीत यायचं आहे, त्यांना तू काय सल्ला देशील, असं विचारल्यानंतर विकी म्हणाला, “फक्त नशिबावर विश्वास ठेवून येऊ नका. तयारीसुद्धा करून या.”

दरम्यान, विकी व कतरिना यांनी डिसेंबर २०२१ मध्ये लग्नगाठ बांधली होती आणि आता ही जोडी लवकरच आई-बाबा होणार आहे. त्यामुळे विकी कतरिनासह त्यांच्या चाहत्यांमध्येही खूप उत्सुकता असल्याचं पाहायला मिळतं.