लव मी – एक सामाजिक भान

‘लव मी’ हे एक सामाजिक आणि कौटुंबिक विषय असलेले दोन अंकी नाटक आहे. सामाजिकतेचे भान ठेऊन मनोरंजनात्मक पद्धतीने सादर केले जाणारे हे फक्त नाटक नसून ती एक सामाजिक चळवळ आहे. कुटुंबातील एखाद्या व्यक्तीला जर एखादा आजार झाल्यास, त्या व्यक्तीस व तिच्या कुटुंबियांस समाजातील कोणत्या-कोणत्या समस्यांना सामोरे जावे लागते. त्याचप्रमाणे काही आजारांबद्दल जनमानसांत असणाऱ्या गैरसमजामुळे त्या आजारी व्यक्तीस मिळणारी गैरवर्तणूक किती अयोग्य आहे ह्याचा आरसा समाजासमोर ठेऊन समाजातील अज्ञान दूर करण्याचा प्रयत्न ह्या नाटकाद्वारे करण्यात आलेला आहे. कष्टसाध्य आजार झलेली व्यक्ती देखील एक माणूसच आहे. तिला जगण्याचा पूर्ण अधिकार आहे. जर त्या व्यक्तीस योग्य औषोधोपचार, प्रेम, आधार मिळाला तर ती देखील इतर व्यक्तींप्रमाणेच सुखकर आयुष्य जगू शकते. हा विचार या नाटकाद्वारे मांडण्याचा प्रयत्न केला गेलेला आहे.

दैनंदिन आयुष्य जगात असताना, ‘स्वतःसाठी तर जगतोच पण आपण समाजाचे ऋण लागतो. आपण समाजासाठी काहीतरी केले पाहिजे या भावनेतून अष्टपैलू व्यक्तिमत्व डॉ. संदीप हरणे यांनी या नाटकाचे लेखन व गणेश तळेकर यांच्यासमवेत ‘शीतल एंटरटेनमेंट’ या बॅनरखाली निर्मिती केली. डॉ. संदीप हरणे यांनी स्वतः ह्या नाटकाची गाणी लिहिलेली असून अभिनय देखील केलेला आहे. दिग्दर्शक श्रावण पेडामकर येणी या नाटकाचे दिग्दर्शन केलेले असून नेपथ्य पालेकर, तर संगीताची धुरा श्री एकनाथ दयाळकर यांनी सांभाळलेली आहे. श्री एकनाथ दयाळकर, डॉ. संदीप हरणे आणि नम्रता दास यांनी पार्श्वगायन केलेले आहे. वेशभूषा अनिल मुळीक तर रंगभूषा अनिल आरोसकर यांनी केलेले आहे. त्याचप्रमाणे डॉ. संदीप हरणे, शुभांगी कोलते, रुपेश मिरकर, वर्ष गावकर, श्रीकांत आढव आणि परम इंगळे इत्यादी कलाकार मंडळींनी या नाटकात काम केलेले आहे.

१ डिसेंबर २०१६ रोजी झालेला ‘लव मी’ नाटकाचा शुभारंभाचा प्रयोग यशस्वी झाला. फक्त काही शहरं, राज्यं अथवा देशापुरतीच मर्यादित न राहता जगभर ह्या नाटकाचे प्रयोग करण्याचा ध्यास उराशी बाळगणाऱ्या ‘लव मी’ नाटकाचा पुढील प्रयोग २१ डिसेंबर २०१६ रोजी दुपारी ४ वाजता प्रबोधनकार ठाकरे नाट्यगृह, बोरीवली आणि २५ डिसेंबर २०१६ रोजी विष्णुदास भावे नाट्यगृह, वाशी येथे सादर करण्यात येणार आहे.