स्टार प्रवाहच्या ‘या’ मालिकेत एन्ट्री घेणार प्रिया बेर्डे! १० वर्षांनी छोट्या पडद्यावर कमबॅक, म्हणाल्या, “पाहूनच धडकी भरते…”

‘स्टार प्रवाह’वर येत्या २७ ऑक्टोबरपासून ‘काजळमाया’ ही थ्रिलर मालिका सुरू होणार आहे. यामध्ये लोकप्रिय अभिनेता अक्षय केळकर, अभिनेत्री वैष्णवी कल्याणकर आणि नवोदित अभिनेत्री रुची जाईल यांच्या प्रमुख भूमिका असणार आहे. यांच्यासह या मालिकेत लोकप्रिय अभिनेत्री प्रिया बेर्डे सुद्धा महत्त्वपूर्ण भूमिका साकारणार आहेत.

‘काजळमाया’ मालिकेतून कनकदत्ता या नव्या रुपात त्या पुन्हा एकदा मालिका विश्व गाजवण्यासाठी सज्ज झाल्या आहेत. चेटकीण वंशामधील विलक्षण सुंदर असलेल्या आणि तंत्रविद्येत प्रविण असलेल्या पर्णिका नावाच्या चेटकीणीची गोष्ट म्हणजेच काजळमाया ही मालिका. रुपाने सुंदर असलेली पर्णिका कमालीची स्वार्थी, निर्दयी आणि संधीसाधू आहे. चेटकीण वंश वाढवण्याचं एकमेव ध्येय तिच्या डोळ्यांसमोर आहे आणि त्यासाठी ती कोणत्याही थराला जाऊ शकते. कनकदत्ता ही पर्णिकाची आई. सुडाच्या भावनेने पेटलेली, अत्यंत खुनशी आणि आपल्या चेटकीण मुलीबद्दल अभिमान बाळगणारी.

कनकदत्ताची आपल्या मुलीने म्हणजेच पर्णिकाने चेटकीण वंश पुढे वाढवावा एवढीच इच्छा आहे. याच हेतूने ती पर्णिकाच्या राक्षसी महत्त्वाकांक्षेला खत पाणी घालते. कनकदत्ता आणि पर्णिका आपलं ध्येय पूर्ण करण्यात यशस्वी ठरणार का याची उत्कंठावर्धक गोष्ट ‘काजळमाया’ मालिकेतून पाहायला मिळेल.

‘कनकदत्ता’ या भूमिकेविषयी सांगताना प्रिया बेर्डे म्हणाल्या, “माझ्या आतापर्यंतच्या प्रवासात अशा पद्धतीची भूमिका मी कधीही साकारलेली नाही. कनकदत्ताला पाहता क्षणीच धडकी भरते. ती झटकन वेषांतर करते. तिला संमोहन विद्या अवगत आहे. या भूमिकेला अनेक कंगोरे आहेत…त्यामुळे कनकदत्ता प्रेक्षकांना नक्की आवडेल याची खात्री आहे.”

दरम्यान, ‘काजळमाया’ ही नवीन गूढ मालिका २७ ऑक्टोबरपासून रात्री १०. ३० वाजता स्टार प्रवाहवर प्रसारित करण्यात येणार आहे.