मुंबई: नागरिकांना मुख्यमंत्री सहाय्यता निधीचा अधिकाधिक लाभ व्हावा यासाठी मुख्यमंत्री वैद्यकीय सहाय्यता कक्षाने ‘सीएमएमआरएफ’ ॲपवर अर्ज करण्याची सुविधा उपलब्ध केली आहे. या ॲपमुळे नागरिकांना मुख्यमंत्री वैद्यकीय सहायता निधी मिळविणे सोपे झाले असून, त्यासाठी त्यांना आता मंत्रालयात येण्याची आवश्यकता नाही. मुख्यमंत्री वैद्यकीय सहाय्यता कक्षाने अवघ्या १४ महिन्यांत १३ हजाराहून अधिक गरजू रुग्णांना ११२ कोटी १२ लाख रुपयांची आर्थिक मदत दिली आहे.
मुख्यमंत्री वैद्यकीय सहायता निधीमध्ये अनेक आजारांचा समावेश करण्यात आला आहे. यामध्ये हृदय शस्त्रक्रिया, अँजिओप्लास्टी, कर्करोगावरील शस्त्रक्रिया, केमोथेरपी, जन्मतः मूकबधिर लहान मुलांच्यासाठी अत्यावश्यक असणारी कॉकलीयर इनप्लांट शस्त्रक्रिया, रक्तशुद्धीकरण, सर्व प्रकारचे अवयव प्रत्यारोपण शस्त्रक्रिया, विद्युत अपघात, रस्ते अपघात, भाजलेले रुग्ण, जन्मतः लहान मुलांच्या हृदयशस्त्रक्रिया आदींचा समावेश आहे.
हेही वाचा… ब्लॉकमुळे प्रवाशांचे प्रचंड हाल; सीएसएमटी – पनवेल शेवटची लोकल रात्री १०.५८ वाजता
मुख्यमंत्री वैद्यकीय सहाय्यता कक्षाने उत्कृष्ट कामगिरी करून राज्यातील हजारो रुग्णांचे प्राण वाचविण्यात यश मिळविले आहे. या सेवेचा अधिकाधिक नागरिकांना लाभ घ्यावा, असे आवाहन मुख्यमंत्री सहाय्यता कक्षाचे प्रमुख मंगेश चिवटे यांनी केले आहे.
असा केला निधी वाटप
गतवर्षी जुलैमध्ये १७८ रुग्णांना ७६ लाख रुपयांची मदत देण्यात आली. त्यानंतर ऑगस्टमध्ये २४४ रुग्णांना १ कोटी १ लाख रुपये, सप्टेंबरमध्ये ३१९ रुग्णांना १ कोटी ८६ लाख रुपये, ऑक्टोबरमध्ये २७६ रुग्णांना २ कोटी ३५ लाख रुपये, नोव्हेंबरमध्ये ५२७ रुग्णांना ४ कोटी ५० लाख रुपये, डिसेंबरमध्ये १०३१ रुग्णांना ८ कोटी ५२ लाख रुपये, जानेवारी २०२३ मध्ये १०३२ रुग्णांना ८ कोटी ९० लाख रुपये, तर फेब्रुवारीमध्ये १२७४ रुग्णांना १० कोटी ५९ लाख रुपये, मार्चमध्ये १४६९ रुग्णांना ११ कोटी ९३ लाख रुपये, एप्रिलमध्ये ११९० रुग्णांना ९ कोटी ९१ लाख रुपये, मेमध्ये १३२९ रुग्णांना ११ कोटी २५ लाख रुपये, तर जूनमध्ये १७२८ रुग्णांना १४ कोटी ६२ लाख रुपये, जुलै १४८८ रुग्णांना १२ कोटी ७२ लाख रुपये, तर ऑगस्टमध्ये विक्रमी १५६७ रुग्णांना १३ कोटी १४ लाख रुपये वैद्यकीय मदत देण्यात आली आहे.
