मुंबईः राष्ट्रवादी काँग्रेसचे माजी आमदार दिवंगत बाबा सिद्दीकी यांच्या हत्येनंतर त्यांचा मोबाइल क्रमांक दुसऱ्या सीमकार्डवर सुरू करण्याचा प्रयत्न केल्याप्रकरणी वांद्रे पोलिसांनी दिल्लीतून एका संशयीताला ताब्यात घेतले आहे. विवेक सब्रवाल असे संशयीताचे नाव असून तो त्याद्वारे सायबर फसवणूक करण्याच्या प्रयत्नात होता. आरोपीविरोधात यापूर्वी दोन सायबर फसवणूकीचे गुन्हे दाखल आहेत. त्यातील एका प्रकरणातून तो जामिनावर सुटला होता. याप्रकरणी मुंबईतील वांद्रे पोलीस ठाण्यात गुन्हा दाखल करण्यात आला आहे.
विवेक सब्रवाल असे दिल्लीवरून ताब्यात घेण्यात आलेल्या आरोपीचे नाव आहे. तो दिल्ली परिसरातील बुराडी येथील रहिवासी आहे. त्याच्याविरोधात यापूर्वीही सायबर गुन्हे दाखल आहेत. आरोपीने बाबा सिद्दीकी यांचा मोबाईल क्रमांक दुसऱ्या सीमकार्डमध्ये सुरू करून फसवणूक करण्याचा प्रयत्न केल्याचा आरोप आहे. दिल्लीतील स्थानिक पोलिसांना माहिती देऊन त्याला रविवारी सकाळी दिल्लीतून ताब्यात घेण्यात आले. त्यानंतर त्याला मुंबई आणण्यात आले आहे. मुंबईत त्याच्याविरोधात यापूर्वी दोन गुन्हे दाखल करण्यात आले आहेत. त्यातील एक खटला एस्प्लेनेड न्यायालय क्रमांक ३७ व दुसरा बोरीवली न्यायालय क्रमांक १७ येथे सुरू आहे. बोरीवली येथील प्रकरणात आरोपीला जामिन मिळाला होता.
राष्ट्रवादीचे नेते आणि माजी मंत्री बाबा सिद्दीकी यांची मुलगी डॉ. अर्शिया सिद्दीकी (३५) यांचे ‘फ्लेवर फूड व्हेंचर’ नावाचे हॉटेल आहे, तर पत्नी शेहझीन सिद्दीकी ‘झियर्स बिझनेस इंडिया एलएलपी’ नावाची रिअल इस्टेट कंपनी चालवतात. सिद्दीकी यांच्या हत्येनंतर त्यांच्या आठवणी जतन करण्यासाठी कुटुंबियांनी बाबा सिद्दीकी यांचा मोबाइल क्रमांक सुरूच ठेवला आहे. हा मोबाइल क्रमांक वरील दोन्ही व्यवसायाशी संलग्न ठेवण्यात आला आहे. २४ जून रोजी दिवंगत बाबा सिद्दीकी यांच्या पत्नी शेहझीन सिद्दीकी यांच्या नावाने एक ई-मेल आला होता. त्यात बाबा सिद्दीकी यांच्या मोबाइल क्रमांकासाठी अधिकृत स्वाक्षरी हक्काबाबत विचारणा करण्यात आली होती. या मेलबरोबर शेहझीन सिद्दीकी यांचा आधार क्रमांक, पॅन कार्ड, वस्तू सेवा क्रमांक (जीएसटी) आणि कुटुंबाच्या कंपनीचे लेटरहेडही वापरले होते.
आरोपीने मोबाईल दुसऱ्या सीमकार्डवर सुरू करून त्याद्वारे फसवणूक करण्याचा कट रचला होता. पण कंपनीनने संबंधित व्यक्तीला अर्ज प्राप्त झाल्याचे ई-मेलद्वारे कळवले होते. कंपनीने बाबा सिद्दीकी यांची मुलगी डॉ. अर्शिया यांना देखील ई-मेलच्या सीसीमध्ये ठेवले होतते. त्यामुळे हा प्रकार फसवणुकीचा असल्याचे कुटुंबीयांच्या लक्षात आले. याबाबत डॉ. अर्शिया यांनी वांद्रे पोलीस ठाण्यात तक्रार दाखल केली. या प्रकरणी वांद्रे पोलिसांनी भारतीय न्याय संहितेच्या कलम ३१९(२) ( फसवणूक करणे), ६२ (कैदेस पात्र असलेल्या गुन्ह्याचा प्रयत्न), ३३५ (खोटे दस्तऐवज तयार करणे), ३३६ (२) व ३३६ (३) (दस्तऐवजांचे बनावटीकरण), आणि ३४०(२) (बनावट इलेक्ट्रॉनिक नोंदी खऱ्या असल्याचे भासवणे) अंतर्गत गुन्हा दाखल केला. बाबा सिद्दीकी यांची ऑक्टोबर २०२४ मध्ये गोळ्या झाडून हत्या करण्यात आली होती.
