– पर्यावरण रक्षणाच्या उद्देशाने सुरू करण्यात आलेल्या या स्पर्धेत सहभागी होण्याचे आवाहन
– विजेत्याला ९ हजार ९९९ रुपयांचे पारितोषिक
– मुंबई, नाशिक, पुणे, छत्रपती संभाजीनगर, अहिल्यानगर आणि नागपूर विभागांत स्पर्धेचे आयोजन
मुंबई : मंगलमय आणि पवित्र कार्याची सुरुवात नेहमी गणेशाच्या पूजनाने केली जाते. अवघ्या महाराष्ट्राचे दैवत असलेल्या या श्री गणेशाचा उत्सव साजरा करताना त्याला पर्यावरण रक्षणाचे उद्दिष्ट जोडणाऱ्या ‘लोकसत्ता इकोफ्रेंडली घरगुती गणेशोत्सव स्पर्धा २०२५’चे आयोजन यंदाही करण्यात आले आहे. गणरायाचा उत्सवाच्या निमित्ताने ‘पर्यावरण रक्षणाचा श्रीगणेशा’ व्हावा, या उद्देशाने ‘लोकसत्ता’, ‘महाराष्ट्र प्रदूषण नियंत्रण मंडळ’ आणि ‘पर्यावरणीय व वातावरणीय बदल विभाग’ यांच्या संयुक्त विद्यमाने आयोजित करण्यात आलेल्या ‘लोकसत्ता इकोफ्रेंडली घरगुती गणेशोत्सव स्पर्धा २०२५’चा लोकार्पण सोहळा येत्या सोमवारी, २५ ऑगस्ट रोजी आयोजित करण्यात आला आहे.
गणेशाच्या आगमनाचा हा सोहळा साजरा करताना जाणीवपूर्वक पर्यावरणपूरक गणेशमूर्तीची प्रतिष्ठापना आणि त्याभोवतालीची सजावट करतानाही प्लास्टिकचा वापर टाळून पर्यावरणाचे भान बाळगणाऱ्या गणेशभक्तांचा यथोचित सन्मान ‘लोकसत्ता इकोफ्रेंडली घरगुती गणेशोत्सव स्पर्धे’च्या माध्यमातून केला जातो. अशा पध्दतीने पर्यावरणस्नेही साहित्याचा वापर करून सजावट करणाऱ्या गणेशभक्तांना या स्पर्धेत सहभागी होता येणार आहे.
या स्पर्धेतील प्रवेश निश्चित करण्यासाठी घरगुती गणेशमूर्ती आणि सजावटीची छायाचित्रे व माहिती शनिवार, ६ सप्टेंबरपर्यंत पाठवणे आवश्यक आहे. पर्यावरण संवर्धनाची सुरूवात ही प्रत्येक व्यक्तीकडून, त्याच्या घरातून व्हायला हवी. त्यामुळे गणेश उत्सवाच्या माध्यमातून हे भान जपताना गणेशमूर्तीच्या निवडीपासून ते सजावट करतानाही पर्यावरणासाठी घातक असणाऱ्या प्लास्टिक, थर्माकोल आदी वस्तूंचा वापर करणे टाळायचे आहे. आणि म्हणूनच या इकोफ्रेंडली घरगुती गणेशोत्सव स्पर्धेत सहभागी होणाऱ्या स्पर्धकांच्या कल्पकतेचा कस लागणार आहे.
स्पर्धेत सहभागी कसे व्हाल ?
‘लोकसत्ता इकोफ्रेंडली घरगुती गणेशोत्सव स्पर्धा २०२५’ ही मुंबई, नाशिक, पुणे, छत्रपती संभाजीनगर, अहिल्यानगर आणि नागपूर विभागांत घेण्यात येणार असून प्रत्येक विभागासाठी स्वतंत्र पारितोषिके देण्यात येणार आहेत. या स्पर्धेसाठी गणेशमूर्ती आणि सजावटीची तीन ते चार रंगीत छायाचित्रे व माहिती ‘लोकसत्ता’च्या कार्यालयात किंवा loksatta.ecoganesha@gmail.com या ई – मेल आयडीवर पाठवायची आहेत. गणेशमूर्ती व सजावट ही स्पष्ट दिसणे आवश्यक असल्यामुळे छायाचित्रे ही विविध बाजूंनी घ्यावी. गणेशमूर्ती व सजावट पर्यावरणस्नेही असावी. तसेच प्लास्टिक व थर्माकोलचा वापर नसावा. प्रत्येक छायाचित्रांबरोबर स्पर्धकाचे नाव, घरचा पत्ता, दूरध्वनी, मोबाइल क्रमांक नमूद करावा. ई- मेलबरोबर सजावटीसाठी वापरलेल्या साहित्याची यादी थोडक्यात जोडावी. सदर छायाचित्रे व माहिती शनिवार, ६ सप्टेंबरपर्यंत पाठवणे आवश्यक आहे. त्यानंतर आलेली छायाचित्रे व माहितीचा स्पर्धेसाठी विचार केला जाणार नाही. परीक्षकांचा निर्णय अंतिम राहील.
पारितोषिकांची लयलूट
प्रत्येक विभागासाठी स्वतंत्र पारितोषिके
प्रथम पारितोषिक : ९ हजार ९९९ रुपये
द्वितीय पारितोषिक : ६ हजार ६६६ रुपये
तृतीय पारितोषिक : २ हजार १ रुपये
सर्व विजेत्यांना मानचिन्ह आणि प्रमाणपत्र
अधिक माहितीसाठी संपर्क : लोकसत्ता ब्रॅण्ड विभाग, ७ वा मजला, मफतलाल सेंटर, नरिमन पॉईंट, मुंबई – ४०००२१.
प्रायोजक
मुख्य प्रायोजक – महाराष्ट्र प्रदूषण नियंत्रण मंडळ, पर्यावरण व वातावरणीय बदल विभाग पर्यावरण
पॉवर्ड बाय – व्हि. एम मुसळुणकर ज्वेलर्स
