मुंबई : शिवडी – वरळी उन्नत रस्ता प्रकल्पाअंतर्गत उभारण्यात येणाऱ्या प्रभादेवी द्विस्तरीय पुलाच्या कामात बाधित होणाऱ्या दोन इमारतींमधील ८३ रहिवाशांसाठी अखेर म्हाडाने आसपासच्या परिसरातील ११९ घरे शोधली आहेत. या घरांची यादी नुकतीच मुंबई महानगर प्रदेश विकास प्राधिकरणाला (एमएमआरडीए) सादर करण्यात आली आहे.
आता रहिवाशांच्या पसंतीनुसार घरे निश्चित करून त्यांचे पुनर्वसन करण्यात येणार आहे. रहिवाशांच्या पसंतीनुसार ११९ पैकी ८३ घरे एमएमआरडीएला वर्ग करण्यात येणार असून यासाठी एमएमआरडीएकडून शीघ्रगणकाच्या ११० टक्के दराने रक्कम घेण्याचा म्हाडाचा प्रस्ताव आहे.
अटल सेतूला जोडणारा शिवडी-वरळी उन्नत रस्ता प्रभादेवी पूल ओलांडून जात आहे. त्यामुळे जुना पूल पाडून त्याजागी नवीन द्विस्तरीय पूल बांधण्यात येणार आहे. जुन्या पुलाचे पाडकाम सध्या एमएमआरडीए करीत आहे. या पुलाच्या कामात हाजी नुरानी आणि लक्ष्मी या दोन इमारती बाधित होत असून यात ८३ घरे आहेत. या ८३ रहिवाशांचे पुनर्वसन म्हाडाच्या घरात करण्याचा निर्णय राज्य सरकारने घेतला आहे.
म्हाडाला पुनर्विकासाच्या माध्यमातून विकासकाकडून उपलब्ध झालेली घरे या रहिवाशांना कायमस्वरुपी दिली जाणार आहेत. या निर्णयाप्रमाणे एमएमआरडीएने म्हाडाकडे घरांची मागणी केली होती. या मागणीनुसार दादर आणि आसपासच्या ठिकाणची ११९ घरे म्हाडाच्या मुंबई इमारत दुरुस्ती आणि पुनर्रचना मंडळाने शोधल्याची माहिती मंडळातील अधिकाऱ्यांनी दिली. या घरांची यादी एमएमआरडीएला सादर करण्यात आली आहे. आता ही घरे रहिवाशांना दाखवण्यात येणार असून त्यांच्या पसंतीनंतर घराच्या वितरणाचा अंतिम निर्णय घेण्यात येणार आहे. म्हाडाकडून घराची यादी प्राप्त झाली असून त्यावर पुढील कार्यवाही सुरू असल्याची माहिती एमएमआरडीएतील वरिष्ठ अधिकाऱ्यांनी दिली.
पुनर्वसनासाठी दुरुस्ती मंडळाने शोधलेली घरे ३०० ते ६५० चौरस फुटांची असून रहिवाशांना किमान ४०५ चौरस फुटांचे घर मिळणार आहे. त्यामुळे ४०५ ते ६५० चौरस फुटांच्या घरांची निश्चिती एमएमआरडीएकडून केली जाण्याची शक्यता आहे. या घरांसाठी शीघ्रगणकाच्या ११० टक्के दराने एमएमआरडीएला रक्कम मोजावी लागणार आहे. रहिवाशांसाठी ही घरे शोधण्यात आली आहेत. मात्र या घरांना रहिवाशांची पसंती मिळते का आणि ते ही घरे स्वीकारतात का यावरच पुनर्वसनाचा प्रश्न मार्गी लागतो की नाही हे ठरणार आहे.
