मुंबईः अल्पवयीन मुलीवर अत्याचार केल्याप्रकरणी पोलिसांनी पीडित मुलीचे वडील व बहिणीच्या पतीविरोधात बलात्कार व बालकांचे लैंगिक अत्याचारापासून संरक्षण कायद्याअंतर्गत गुन्हा दाखल केला आहे. याप्रकरणी पोलिसांनी बहिणीच्या पतीला अटक केली असून गुन्हा दाखल झाल्यानंतर वडिलांनी पळ काढला आहे. पोलीस आरोपींचा शोध घेत आहेत.
पीडित मुलगी १६ वर्षांची आहे. तक्रारीनुसार एप्रिल २०२४ मध्ये पीडित मुलगी घरी झोपली असताना आरोपी पित्याने तिच्या तोंडावर कपडा बांधून लैंगिक अत्याचार केला. तसेच हा प्रकार कोणाला सांगितल्यास तुझ्या आईला ठार मारेन, अशी धमकी दिली. त्यामुळे पीडित मुलगी घाबरली व तिने हा प्रकार कोणालाही सांगितला नाही. त्यानंतर मार्च महिन्यात पीडित मुलगी घरी झोपली.
घरात ती एकटीच असल्याचे पाहून आरोपीने तिच्याशी अश्लील कृत्य केले. याप्रकरणी पीडित मुलीने नुकतीच पोलिसांकडे तक्रार केल्यांनतर बलात्कार व पोक्सो कायद्याअंतर्गत गुन्हा दाखल करण्यात आला. याप्रकरणी पीडित मुलीच्या बहिणीच्या पतीला पोलिसांनी अटक केली. आरोपी पित्याचा शोध सुरू आहे.
अल्पवयीन मुलांविरोधात घडलेल्या गुन्ह्यांमध्ये वाढ
मुंबईत अल्पवयीन मुले व मुलींविरोधात घडलेल्या लैंगिक अत्याचाराच्या घटनांमध्येही वाढ झाली आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्याअंतर्गत १३४१ गुन्ह्यांची नोंद झाली होती. २०२३ मध्ये पोक्सो कायद्याअंतर्गत ११०८ गुन्ह्यांची नोंद झाली होती. मुंबईत २०२४ मध्ये पोक्सो कायद्याअंतर्गत दाखल गुन्ह्यांमध्ये ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे.
२०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते. २०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते. याशिवाय विनयभंग व छेडछाड-अश्लील शेरेबाजी या गुन्ह्यांची उकल होण्याच्या प्रमाणातही अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घट झाली आहे. अल्पवयीन मुलांविरोधातील अत्याचाराच्या घटनांमध्ये बहुसंख्य आरोपी परिचित व्यक्ती आहेत. तसेच काही प्रकरणांमध्ये अल्पवयीन आरोपींचा सहभाग असल्याचेही निष्पन्न झाले होते.
