मुंबई : जुहू येथे बेकायदेशीरपणे सुरू असलेल्या एका हुक्का पार्लरवर जुहू पोलिसांनी रविवारी मध्यरात्री छापा टाकला. या पार्लरमध्ये बंदी असलेल्या तंबाखुचे हुक्क्याद्वारे सेवन करण्यात येत असल्याचे आढळले. पोलिसांनी या कारवाईत हुक्का पार्लरचा व्यवस्थापक, कर्मचारी, वेटर, तसेच ४५ ग्राहकांविरोधात गुन्हा दाखल करून कारवाई केली. यामध्ये ५ तरुणींचाही समावेश आहे. हुक्क्याचे सेवन करण्यासाठी आलेले सर्व ग्राहक तरुण असून २० ते २५ वर्षे वयोगटातील आहेत.
अंधेरी पश्चिम येथील जेव्हीपीडी जुहू येथे ‘टिल नेक्स्ट टाईम’ नावाचा हुक्का पार्लर आहे. या हुक्का पार्लरमध्ये ग्राहकांना तंबाखूजन्य हुक्का दिला जात असल्याची माहिती जुहू पोलिसांना मिळाली. त्यानुसार पोलिसांनी रविवारी मध्यरात्री तेथे छापा टाकला. यावेळी पार्लरमध्ये हुक्का बनविण्यासाठी वापरण्यात येत असलेले फ्लेवर, काचाचे भांडे, रबरी नळ्या आणि इतर साहित्य आढळले. आसन व्यवस्थेच्या ३० टक्के भागात स्मोकिंग झोन तयार करून त्यामध्ये हर्बल हुक्का पुरविण्यास परवानगी आहे. मात्र या पार्लरमध्ये तंबाखूपासून तयार केलेल्या वेगवेगळ्या स्वादाचा हुक्का पुरविण्यात येत होता.
पोलिसांनी पंचासमक्ष हुक्का पार्लरची तपासणी करून हुक्का पार्लरचा व्यवस्थापक इरफान खान (२७), सहव्यवस्थापक रिझवान चौधरी (२५), तसेच हुक्का बनविणारे आणि वेटर म्हणून काम करणाऱ्या १० जणांना ताब्यात घेतले. या हुक्का पार्लरमध्ये हुक्क्याचे सेवन करण्यासाठी आलेल्या ४५ ग्राहकांवर कारवाई करण्यात आली. हे सर्व तरूण २० ते ३० वर्षे वयोगटातील असून त्यांच्यात ५ तरुणींचा समावेश आहे. त्यांच्यावर कलम ३५ (३) अन्वये नोटीस बजावण्यात आली. या सर्व आरोपींविरोधात सिगारेट आणि इतर तंबाखूजन्य उत्पादने (जाहिरात प्रतिबंध आणि व्यापार, वाणिज्य व्यवहार आणि उत्पादन, पुरवठा व वितरण यांचे विनियमन अधिनियम २०२३ च्या कलम २०, २१, २१ (अ), ४, ४ (अ), ७, तसेच भारतीय न्याय संहितेच्या कलम १२५, २८७, ३ (५) अन्वये गुन्हा दाखल करण्यात आला आहे.
हुक्का पार्लरमध्ये आगीचा धोका
या हुक्का पार्लरमध्ये अग्निसुरक्षा लेखा परीक्षण करण्यात आलेले नव्हते. हुक्का पार्लरच्या एका टेबलाजवळ झाऱ्यामध्ये पेटते निखारे आढळले. त्यातून ठिणग्या बाहेर पडत होत्या. सर्वत्र धूर पसरला होता. हुक्का पार्लरमध्ये ज्वलनशील साहित्य होते. त्यामुळे आगीचा मोठा धोका होता, असे पोलिसांनी सांगितले.
