राज्यात दुधाचा ‘महापूर’; गत आर्थिक वर्षात १ कोटी ७१ लाख लिटरचे दैनंदिन विक्रमी संकलन

२०१६-१७ मध्ये दुधाचे जागतिक दर १७ रुपये प्रति लिटरवर आले होते. यंदा जागतिक पातळीवरही दूध उत्पादनात वाढ झाली आहे. बटर आणि दूध भुकटीच्या दरात घसरण झाल्यामुळे राज्यात दूध खरेदी दर २५ रुपयांवर आले. या काळात सरकारी अनुदानाचा शेतकऱ्यांना मोठा दिलासा मिळाला. सरकारने अनुदानासाठी ७५८ कोटी रुपये मंजूर केले आहेत. जुलै ते सप्टेंबर काळात संकलित झालेल्या दुधाच्या अनुदानापोटी सरकारने आजवर ५३८ कोटी रुपयांचे वितरण केले आहे, तर १५३ कोटी रुपयांचे वितरण बाकी आहे.

खासगी आणि सहकारी ४७१ दूध संघांकडून दूध खरेदी आणि प्रक्रिया होते. सरकारी अनुदानाचा शेतकऱ्यांना फायदा झाल्याचे दुग्धविकास आयुक्त प्रशांत मोहोड यांनी स्पष्ट केले.

वर्षनिहाय संकलन

प्रति दिन–लाख लिटर

२०१९-२० ११६.४१

२०२०-२१ ११६.९९

२०२१-२२ १२१.५१

२०२२-२३ १२४.९५

२०२३-२४ १७१.१८

भेसळ रोखण्यासाठी संयुक्त कार्यवाही

●भेसळीस आळा घालण्यासाठी कायद्याची कडक अंमलबजावणी करा, असे निर्देश मुख्यमंत्री देवेंद्र फडणवीस यांनी दिले. दुग्ध व्यवसाय विभागाच्या १०० दिवसांच्या आराखड्याचा त्यांनी आढावा घेतला.

● भेसळीवर समन्वयाने प्रतिबंधात्मक कारवाई करण्यासाठी अन्न व औषध प्रशासन विभाग आणि दुग्ध व्यवसाय विकास विभाग यांच्यामार्फत संयुक्तरीत्या मोहिमा राबविण्यात येतील, असेही फडणवीस या वेळी म्हणाले.