मुंबई : राज्य कामगार विमा महामंडळाच्या (ईएसआयसी) छत्रपती संभाजीनगरमधील २०० खाटांच्या रुग्णालयासह ९ रुग्णालयांना शासकीय जमीन देण्यास राज्य मंत्रिमंडळाने मंगळवारी मान्यता दिली. छत्रपती संभाजीनगर परिसरातील शेंद्रा, बिडकीन, डीएमआयसी वाळुंज, चिकलठाणा व रेल्वे स्थानकासारख्या औद्योगिक वसाहतींमुळे कामगारवर्गाची संख्या झपाट्याने वाढत आहे. त्यामुळे शहरातील औद्योगिक विस्तार आणि वाढत्या कामगारवर्गाच्या आरोग्य गरजांचा विचार करून महामंडळाकडून हे रुग्णालय उभारण्यात येणार आहे.

त्यासाठी करोडी येथील १५ एकर गायरान जमीन दिली जाईल. त्याचबरोबर बिबवेवाडी (पुणे), अहिल्यानगर, सांगली, अमरावती, बल्लारपूर (चंद्रपूर), सिन्नर (नाशिक), बारामती(पुणे), सातारा आणि पनवेल (रायगड) येथील प्रस्तावित रूग्णालयांसाठीही शासकीय जमीन उपलब्ध करून देण्यास तत्वतः मान्यता देण्यात आली.