“महाराष्ट्र सरकार झोपलंय का?”; कर्नाटकच्या ‘त्या’ निर्णयाचा उल्लेख करत विजय वडेट्टीवारांचा हल्लाबोल

कर्नाटकमधील काँग्रेस सरकारनं १९५ तालुक्यांमध्ये जाहीर केला हे सांगत वडेट्टीवार म्हणाले, “राज्यात ३५८ पैकी १९४ तालुके हे दुष्काळात येत असून १६ जिल्ह्यांमध्ये ७५ टक्के पेक्षा कमी पाऊस झाला आहे. सर्वाधिक प्रभावित भागात पश्चिम विदर्भ, पश्चिम महाराष्ट्र, मराठवाड्याचा काही भाग (मध्य महाराष्ट्र) आणि उत्तर महाराष्ट्राचा समावेश आहे. सध्या मराठवाड्यातील सर्वात मोठे धरण असलेल्या जायकवाडीत गतवर्षीच्या ९६.७५ टक्के पाणीसाठ्याच्या तुलनेत केवळ ३४.५२ टक्के पाणीसाठा आहे.”

“ट्रिपल इंजिन सरकारला शेतकऱ्यांच्या समस्यांचं काही पडलेलं नाही”

“पश्चिम महाराष्ट्रातील सर्वात मोठे धरण असलेल्या उजनीमध्ये गेल्या वर्षीच्या १०० टक्क्यांच्या तुलनेत केवळ २३.६५ टक्के पाणीसाठा आहे. संपूर्ण उत्तर महाराष्ट्रातील नाशिक महसूल विभागातील धरणांमध्ये ६८.१२ टक्के, औरंगाबाद विभागात ३२.४५ टक्के आणि पुणे विभागात ७२.८७ टक्के पाणीसाठा आहे. बळीराजा अडचणीत आला असून महाराष्ट्रातील ट्रिपल इंजिन सरकारला शेतकऱ्यांच्या समस्यांचं काही पडलेलं नाही,” अशी टीका विजय वडेट्टीवार यांनी केली.

हेही वाचा : VIDEO: “काँग्रेसने एकदाचं जाहीर करावं की ते आंबेडकरवादाच्या विरोधात…”; वंचितचा हल्लाबोल

“महाराष्ट्र सरकार झोपलंय का?”

“शेतकऱ्यांना पीकविम्याचा लाभ मिळालेला नाही, कर्जाचे पुनर्गठन सरकारने केलेले नाही. मग, महाराष्ट्र सरकार झोपलंय का? असा प्रश्न वडेट्टीवारांनी विचारला. “सर्वसामान्यांचं सरकार म्हणून थापा मारणारे मुख्यमंत्री निष्क्रिय आहेत. एक उपमुख्यमंत्री राजस्थान निवडणूक प्रचारात व्यग्र आहे आणि दुसरे उपमुख्यमंत्री त्यांच्या अखत्यारीत न येणाऱ्या खात्यांच्या बैठका घेऊन स्वतःच्या आमदारांसाठी निधी पळवण्यात व्यग्र आहेत. हे सरकार स्वतःच्या कामात मश्गूल आहे. दुष्काळाने शेतकरी होरपळत असताना त्याच्याकडे या सुस्त सरकारचं लक्ष कधी जाणार? असा प्रश्न करत विजय वडेट्टीवार यांनी राज्य सरकारवर टीकास्त्र सोडले.