विक्रोळीत मिरवणुकीत सहभागी तरूणांनी केला महिला पोलिसांचा विनयभंग

मुंबई : विक्रोळीमध्ये शुक्रवारी एका समाजाची धार्मिक मिरवणूक सुरू असताना त्यात सहभागी काही तरुणांनी एका महिला पोलिसाचा पाठलाग करून तिची छेड काढल्याचे उघडकीस आले आहे. या घटनेची माहिती मिळताच काही राजकीय पक्षांच्या नेत्यांनी शनिवारी पार्कसाईट पोलीस ठण्याबाहेर आंदोलन केले. तसेच आरोपींना तत्काळ अटक करण्याची मागणी आंदोलनकर्त्यांनी केली.

एका समाजातर्फे शुक्रवारी विक्रोळी परिसरात धार्मिक मिरवणूक काढण्यात आली होती. ही मिरवणूक शुक्रवारी रात्री १० च्या सुमारास विक्रोळी पार्कसाईट येथून जात होती. त्याच वेळी कामावरून सुटलेल्या एक महिला पोलीस शिपाई या परिसरातील त्यांच्या नातेवाईकांकडे जात होत्या. मिरवणुकीतील काही तरुणांनी या महिला पोलीस शिपायाची छेड काढली. आरोपींनी काही अंतरापर्यंत या तरुणीचा पाठलागही केला. मात्र पीडित तरुणीने पळ काढून पार्कसाईट पोलीस ठाणे गाठले. घडलेला प्रकार येथील पोलिसांना सांगितल्यानंतर पोलिसांनी विनयभंगाचा गुन्हा दाखल करून तपास सुरू केला.

आणखी वाचा-मुंबई: मध्य रेल्वेवर मालगाडी रुळावरून घसरली

मात्र शनिवारी सकाळी या घटनेची माहिती सर्वदूर पसरली. त्यामुळे राजकीय पक्षांच्या शेकडो कार्यकर्त्यांनी पार्कसाईट पोलीस ठाण्याबाहेर आंदोलन केले. पोलिसांनी तत्काळ आरोपींना अटक करून त्यांच्याविरूद्ध कडक कारवाई करावी, अशी मागणी आंदोलनकर्त्यांनी आहे. पोलिसांनी घटनेची गंभीर दखल घेतली असून आरोपींच्या शोधासाठी पोलिसांनी सहा पथके तयार केली आहेत. परिसरातील सीसी टीव्ही चित्रण आणि मिरवणुकीत सहभागी नागरिकांच्या माहितीवरून आरोपींचा शोध घेण्यात येत आहे.