नागपूर : नागपूर रेल्वे स्थानकावर शुक्रवारी दुपारी एक धक्कादायक घटना घडली. एका युवकाने प्लॅटफॉर्म क्रमांक सात वर उभ्या असलेल्या पुणे हमसफर एक्सप्रेस गाडीच्या छतावर चढण्याचा प्रयत्न केला असता, त्याला ओव्हरहेड वायरचा तीव्र शॉक बसला. त्यामध्ये तो गाडीतून खाली कोसळला आणि गंभीर जखमी झाला. घटनास्थळी उपस्थित लोकांनी तातडीने मदत केली आणि त्याला शासकीय रुग्णालयात दाखल करण्यात आले. त्याची प्रकृती चिंताजनक असल्याचे सांगितले जात आहे.
प्राथमिक माहितीनुसार, संबंधित युवकाची वय अंदाजे २०-२२ वर्षे असून, तो स्थानकावर भटकंती करत होता. काही साक्षीदारांनी सांगितले की, तो गाडीच्या छतावर चढून मोबाईलसाठी फोटो किंवा व्हिडीओ काढण्याचा प्रयत्न करत होता. मात्र, गाडीच्या छतावर चढताच त्याचा स्पर्श ओव्हरहेड इलेक्ट्रिक वायरला झाला आणि त्याला तीव्र विद्युत शॉक बसला. विजेचा झटका एवढा जोरदार होता की तो तात्काळ खाली कोसळला.
स्थानकावरील सुरक्षा रक्षकांनी आणि इतर प्रवाशांनी तातडीने धाव घेतली आणि रेल्वे पोलिसांना घटनेची माहिती दिली. त्यानंतर तातडीने युवकाला इंदिरा गांधी शासकीय वैद्यकीय रुग्णालयात नेण्यात आले. सध्या त्याच्यावर आयसीयू मध्ये उपचार सुरू आहेत. अद्याप युवकाची ओळख पटलेली नाही असून, पोलिसांकडून त्याच्या ओळखीचा शोध सुरू आहे. या घटनेनंतर स्थानकावर काही काळ गोंधळाचे वातावरण निर्माण झाले होते. प्रवाशांमध्ये भीतीचे वातावरण होते, तर अनेकांनी अशा प्रकारच्या धोकादायक कृत्यांविरुद्ध कारवाईची मागणी केली.
रेल्वे प्रशासनाने पुन्हा एकदा स्पष्ट केले आहे की, ओव्हरहेड वायरमध्ये २५,००० व्होल्ट इतकी तीव्र विद्युतधारा असते. अशा वायरजवळ जाणे देखील जीवघेणे ठरू शकते. गाड्यांच्या छतावर चढणे, फोटोसाठी धोका पत्करणे किंवा स्टंट करण्याचे प्रकार अतिशय धोकादायक असून, यामुळे प्राणाला धोका निर्माण होतो.
रेल्वे पोलिसांनी याप्रकरणी अधिक तपास सुरू केला असून, सीसीटीव्ही फुटेजच्या आधारे युवकाच्या हालचालींची माहिती घेतली जात आहे. रेल्वे प्रशासन व पोलिसांनी जनतेला आवाहन केले आहे की, अशा प्रकारच्या वर्तनापासून दूर राहावे आणि आपली तसेच इतरांची सुरक्षितता जपावी.
