नागपूर: सामान्यत: आई मुलीचा अभ्यास घेते, तिला शिकवणी देते आणि दहावीसारख्या महत्त्वपूर्ण टप्प्यात यश मिळवण्यासाठी तिला सहाय्य करते. मात्र शहरातील खुबाळकर मायलेकीची कथा जरा वेगळीच आहे. मुलीने आधी आईला बारावी पास करण्यात सहाय्य केले आणि मग मुलगी स्वत: दहावी उत्तीर्ण झाली. विशेष बाब म्हणजे, आई ज्या शाळेत चपराशी म्हणून कार्यरत आहे, त्याच शाळेत शिकून मुलीने ही यशोगाथा लिहिली आहे.
३८ व्या वर्षी बारावी उत्तीर्ण
शुभांगी खुबाळकर या सदर परिसरातील जाईबाई चौधरी ज्ञानपीठ महाविद्यालयात चपराशीचे काम करतात. त्यांना प्राजंली आणि खुशाली नावाच्या दोन मुली आहेत. मुलींचे वडील बस कंडक्टर म्हणून काम करतात. २००१ साली शुभांगी यांनी नववी इयत्ता उत्तीर्ण केली होती. यानंतर घरची परिस्थिती आणि लग्नामुळे त्यांचे शिक्षण सुटले. मात्र त्यांच्या मनाच्या एका कोपऱ्यात शिक्षणाची जिद्द होती.
२०१७ साली जाईबाई महाविद्यालयात त्यांनी चपराशीची नोकरी स्वीकारली. मुली मोठ्या झाल्यावर त्यांनी आईच्या मनात शिक्षणाबाबत असलेली तळमळ ओळखली. ज्या शाळेत त्या चपराशी म्हणून कार्यरत आहेत त्या शाळेतील संचालक सुधाकर चौधरी यांच्या सहाय्याने मुलींनी आईला त्याच शाळेत प्रवेश घेण्यासाठी प्रोत्साहित केले. इतकी वर्षे शिक्षणाची साथ सुटल्याने आईला शिकवण्यात दोन्ही मुलींनी खूप मदत केली. यातून २०२१ साली शुभांगी यांनी ३६ व्या वर्षी दहावीची परीक्षा दिली आणि ५७ टक्के गुण प्राप्त केले होते.
२०२३ साली बारावीची परीक्षाही आईने उत्तम गुणांनी उत्तीर्ण केली. आई बारावीची तयारी करत असताना छोटी मुलगी खुशाली ही आठव्या वर्गात शिकत होती. आईची शिक्षणाबाबतची जिद्द बघून तिनेही कष्ट घेतले आणि आता दहावीत ८० गुणांसह उत्तीर्ण झाली. खुशालीला भविष्यात संगणक विज्ञान क्षेत्रात करिअर करायचे आहे. खुबाळकर कुटुंबातील मायलेकींची शिक्षणाबाबतची ही जिद्द अनेक अर्थाने प्रेरणादायी आहे.
प्रेरणादायी कथांचे भंडार
शिक्षण म्हणजे लाखो रुपयांचा कारभार होत आहे. प्राथमिक शिक्षण घेण्यासाठीही लाखो रुपयांमध्ये फी द्यावी लागते. नागपूर शहरातील शाळांमध्येही हा प्रकार सर्रासपणे सुरू आहे. यात गरीब कुटुंबातून येणाऱ्या मुलांमध्ये न्यूनगंड निर्माण होतो आणि त्यांचे स्वप्न पूर्ण होतील की नाही, असा प्रश्न निर्माण होतो. मात्र शहरातील सदर परिसरातील एक शाळा आहे, जी शेतकरी, गार्ड, प्लंबरसारखे काम करणाऱ्यांच्या मुलांचे स्वप्न साकारण्याचे कार्य करत आहे. आर्थिक दुर्बलता असली तरी शाळेतील विद्यार्थी नावाजलेल्या महागड्या शाळेतील विद्यार्थ्यांच्या बरोबरीने टक्के प्राप्त करत आहेत.
