कफ सिरप प्रकरणातील दोषींना पोलीस सोडणार नाही… मध्य प्रदेशचे मुख्यमंत्री थेटच म्हणाले…

मुख्यमंत्री मोहन यादव म्हणाले, कफ सिरपमुळे आजारी पडलेल्या मुलांची विचारपूस करण्यासाठी नागपूरमधील एम्स रुग्णालयाला मी भेट दिली. नागपूर प्रशासनासोबतच, एम्स प्रशासन देखील मुलांची पूर्ण काळजी घेत आहे. आम्ही रुग्णवाहिकेसह चांगल्या उपचारांसाठी आवश्यक असलेल्या सर्व सुविधा पुरवण्यास तयार आहोत. सरकार सर्व व्यवस्था करण्यास तयार आहे. ज्यांनी चूक केली आहे त्यांना पोलीस सोडणार नाहीत. सरकार दोषींवर कठोर कारवाई करणार आहे. या प्रकरणातील जबाबदार एकालाही सोडले जाणार नाही.

दरम्यान मध्य प्रदेशचे मुख्यमंत्री मोहन यादव गुरूवारी दुपारी नागपुरात पोहोचले. विमानतळावरून ते थेट नागपूरमधील एम्स हॉस्पिटलमध्ये गेले, जिथे मध्य प्रदेशातील छिंदवाडा जिल्ह्यातील दोन मुले, जी कफ सिरप पिल्याने आजारी पडली होती, त्यांच्यावर उपचार केले जात आहेत. एम्सनंतर, मोहन यादव नागपूरमधील हेल्थ सिटी हॉस्पिटलला भेट देतील, जिथे एका मुलावर उपचार केले जात आहे. त्यानंतर नागपूरमधील शासकीय वैद्यकीय महाविद्यालय व रुग्णालयाला (मेडिकल) भेट देतील, जिथे छिंदवाडा येथील दुसऱ्या मुलावर उपचार केले जात आहेत.

दरम्यान नागपुरात गेल्या महिनाभरात, मध्य प्रदेशातील छिंदवाडा जिल्ह्यातील ३६ कफ सिरपशी संबंधित मुले उपचारासाठी दाखल झाली. त्यापैकी १६ मुलांचा मृत्यू झाला.

कफ सिरप प्राशन केल्यावर लघवी बंद अन्…

छिंदवाडाच्या पारसिया तहसीलमधील मोहडोंगरी गावातील रहिवासी असलेल्या ३ वर्षीय मयंक सूर्यवंशी यांचे काल रात्री १२ वाजता नागपूरच्या मेडिकल रुग्णालयात निधन झाले. २६ सप्टेंबर रोजी मूत्रपिंड निकामी झाल्यामुळे मयंक यांना रुग्णालयात दाखल करण्यात आले. पारसियाचे डॉक्टर अमित ठाकूर यांनी त्यांना कोल्ड्रिफ कफ सिरप लिहून दिले.

२४ सप्टेंबर रोजी कोल्ड्रिफ घेतल्यानंतर, मयंक यांची प्रकृती बिघडली आणि त्यांच्या कुटुंबियांनी त्यांना पुन्हा डॉ. अमित ठाकूर यांच्याकडे नेले. त्यांनी कोल्ड्रिफचा दुसरा डोस लिहून दिला. २५ सप्टेंबर रोजी त्यांची लघवी थांबली. त्यांची प्रकृती बिघडली आणि २६ तारखेला त्यांना नागपूरला दाखल करण्यात आले, जिथे काल रात्री उशिरा मयंक यांचे निधन झाल्याची माहिती मयंकचे वडील निलेश सुर्यवंशी यांनी दिली. याप्रसंगी त्यांना अश्रू अनावर झाले.