लोकसत्ता प्रतिनिधी
नाशिक: मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्यासह राज्यात सारे आलबेल आहे. कुठल्याही प्रकारचा वाद नाही, असे भाजप प्रवक्ते केशव उपाध्ये यांनी सांगितले.
उपाध्ये यांनी नाशिक येथे पत्रकारांशी संवाद साधला. राष्ट्रवादीचे प्रदेशाध्यक्ष जयंत पाटील यांनी जातीय दंगलींविषयी पत्र लिहिले आहे. वास्तविक इतिहास तपासून पहा, या दंगलीचा कोणाला फायदा झाला आहे. या पार्श्वभूमिवर गृहमंत्री फडणवीस हे या सामाजिक, जातीय दंगलींमागे कोण आहेत, याची चौकशी करीत असल्याचे उपाध्ये यांनी सांगितले. उपाध्ये यांनी मोदी सरकारच्या नऊ वर्षाच्या कालावधीत झालेल्या विकास कामांची माहिती दिली.
हेही वाचा… मालेगावच्या भुयारी गटार निविदेतील अटी-शर्ती संशयास्पद; राष्ट्रवादीची उच्च न्यायालयात धाव
केंद्र सरकारने वेगवेगळ्या योजनांना नवा आकार दिला. दर चार दिवसागणिक एक नवी किंवा सुधारित योजना देशात साकारली आहे, त्याचे लाभ सामान्य जनतेला मिळत आहेत. भ्रष्टाचारमुक्त सुशासन, सर्वांच्या सहयोगाने सर्वांचा विकास, बेटी बचाओ-बेटी पढाओ अभियानातून कन्या जन्मास प्रतिष्ठा मिळवून देणे, बेघरांना हक्काचे छप्पर देणाऱ्या पंतप्रधान आवास योजनेतून अडीच कोटींहून अधिक कुटुंबांना मिळालेली सावली, जल जीवनद्वारे २० कोटी घरांत पोहोचलेल्या पेयजलाच्या वाहिन्या, उज्ज्वला योजनेतून साडेआठ कोटी घरांत गेलेले सिलिंडर, सौभाग्य योजनेतून तीन कोटी घरांना मिळालेली वीज जोडणी आदींची माहिती दिली.
यावेळी व्यासपीठावर भाजप प्रदेश सहमुख्य प्रवक्ते अजित चव्हाण, भाजप प्रदेश माध्यम विभाग प्रमुख नवनाथ बन, नाशिक महानगर भाजप अध्यक्ष गिरीश पालवे, आमदार प्रा.देवयानी फरांदे, प्रदेश प्रवक्ते लक्ष्मण सावजी आदी उपस्थित होते.
