आश्रमशाळा विद्यार्थ्यांचा जेईई-नीटचा मार्ग सुकर; आदिवासी विकास विभागाचा सामंजस्य करार

‘फिजिक्सवाला’च्या माध्यमातून राज्यातील शासकीय व अनुदानित आश्रमशाळा, नामांकित शाळेतील इयत्ता अकरावीच्या विद्यार्थ्यांची जेईई-नीट परीक्षेची तयारी करून घेतली जाणार आहे. विद्यार्थ्यांना प्रामुख्याने भौतिक, रसायन, जीवशास्त्र आणि गणित या विषयांचे धडे देण्यात येणार आहे. नाशिक, ठाणे, अमरावती आणि नागपूर या चारही अपर आयुक्त कार्यालयाच्या कार्यक्षेत्रातून प्रत्येकी ८० याप्रमाणे ३२० विद्यार्थ्यांची निवड करण्यात आली आहे. विद्यार्थी निवडीसाठी चाळणी परीक्षा घेण्यात आली होती. जेईई आणि नीट परीक्षेसाठी प्रत्येकी १६० विद्यार्थ्यांना प्रशिक्षण दिले जाणार आहे. शासकीय आश्रमशाळा बोपेगाव (नाशिक) आणि गोटेवाडी (कळमनुरी) येथील केंद्रावर मुलांना तर शासकीय आश्रमशाळा पिसे (शहापूर) आणि शिंधीविहीर (वर्धा) येथील केंद्रावर मुलींना प्रशिक्षण दिले जाणार आहे.

दरम्यान, आदिवासी विकास विभागाच्या दिंडोरी तालुक्यातील भोपेगाव येथील शासकीय आश्रमशाळेतील जेईई-नीट परीक्षा प्रशिक्षण वर्गाचे उद्घाटन आदिवासी विकास आयुक्त लीना बनसोड यांच्या हस्ते तर वर्गखोल्याचे उद्घाटन विद्यार्थ्यांच्या हस्ते करण्यात आले. यावेळी अपर आयुक्त दिनकर पावरा, नाशिक एकात्मिक आदिवासी विकास प्रकल्प कार्यालयाच्या अधिकारी अर्पिता ठुबे, सहायक आयुक्त अरुणकुमार जाधव, फिजिक्सवाला संस्थेचे संचालक रणजित सिंग, सहायक प्रकल्प अधिकारी सुनील नेरकर, प्रमिला सावंत, अनिल महाजन, नामदेव भांगरे, मुख्याध्यापक हेमंत कोतकर आदी उपस्थित होते.

‘फिजिक्सवाला’ देशातील नामवंत शैक्षणिक संस्था असून, त्याद्वारे शिक्षण घेणे हे प्रत्येक विद्यार्थ्याचे स्वप्न असते. सामंजस्य कराराने आश्रमशाळेतील विद्यार्थ्यांना ‘फिजिक्सवाला’मध्ये धडे गिरविण्याची संधी उपलब्ध झाली आहे. त्यामुळे आदिवासी समाजातील विद्यार्थी डॉक्टर-इंजिनीअर होण्यास मदत होईल.-लीना बनसोड (आयुक्त, आदिवासी विकास विभाग)