Navi Mumbai Airport: दिबांचे नाव नाही तर विमानतळाचे उद्घाटन नाही; ६ ऑक्टोबरला भूमिपुत्रांचा धडक मोर्चा

नवी मुंबई आंतरराष्ट्रीय विमानतळाला दि बा पाटील यांचे नाव देण्यात उशीर केला जात असून केंद्राकडून अजून अंतीम अधिसूचना काढली जात नाही. त्यामुळे येथील भूमिपुत्रांनी आंदोलनाचा पावित्रा घेतला असून या आंदोलनाची आंदोलनाची रूपरेषा ठरविण्यासाठी खासदार सुरेश (बाळ्यामामा) म्हात्रे ह्यांनी रविवारी कोपर खैरणे येथील शेतकरी समाज मंदिर मध्ये बैठकीचे आयोजन केले आहे होते.त्यावेळी सुरेश म्हात्रे यांनी आपली भुमिका स्पष्ट केली.

नवी मुंबई आंतरराष्ट्रीय विमानतळाला दिबा पाटील यांचे देण्यात यावे अशी समस्त भूमिपुत्रांची मागणी असून तसा ठराव देखील राज्य सरकारने मंजुर करून केंद्र सरकार कडे पाठवला आहे. तर विमानतळाचे उद्घाटन आता येत्या ८ किंवा ९ऑक्टोबर ला होणार असून विमानतळाला दिबा पाटील यांचे नाव असेल असे सुतोवाच राज्याचे मुख्यमंत्री देवेंद्र फडणवीस यांनी केले आहे. मात्र सदर प्रस्ताव केंद्राकडे असून त्यास तीन वर्ष होत आली तरी अद्याप त्यावर निर्णय घेतला जात नाही आणि असे असताना उद्घाटनाचा घाट घातला जात आहे. त्यामुळे केंद्राने जर उद्घाटना आधी विमानतळाला स्व. दी.बा. पाटील यांचे नाव जाहीर केले तर आम्ही त्यांचे स्वागत करू, सत्कार करू आणि नाव जाहीर न करताच उद्घाटन केले तर संघर्ष अटळ आहे. त्यामुळे नवी मुंबई आंतरराष्ट्रीय विमानतळाला दि बा पाटील यांचे देण्याची अंमलबजावणी करावी म्हणून येत्या ६ ऑक्टोबरला विमानतळावर धडक मोर्चा काढण्यात येणार आहे. या मोर्चात सागरी जिल्ह्यातील जवळपास लाख भूमिपुत्र सामील असतील.

मोर्चात सहभागी होण्यासाठी पाचही सागरी जिल्ह्यातील भूमिपुत्र संघटना आणि प्रतिनिधना याबाबत कळवण्यात आले आहे. अशी माहिती खासदार सुरेश म्हात्रे यांनी दिली आहे. यावेळी माजी खासदार रामशेठ ठाकूर, यांच्या सह शेकडो भूमिपुत्र तसेच संघटना प्रतिनिधी उपस्थित होते.