पनवेल शहर पोलीस झाले ‘पर्यावरण दूत’ 

पनवेल महापालिका प्रशासनाने यंदा जास्तीत जास्त गणेश मूर्ती दान करण्याचे आवाहन नागरिकांना केले होते. नैसर्गिक तलावांमधील जलप्रदूषण रोखून पर्यावरण रक्षण करण्यासाठी हा उपक्रम पालिकेने हाती घेतला होता. अनंत चतुर्दशीपर्यंत ३२१ गणेशमूर्ती पालिकेकडे गणेशभक्तांनी दान करुन पर्यावरण रक्षणाप्रती त्यांची जागरुकता दाखवून दिली.

हेही वाचा… ढोलताशांच्या निनादाने पनवेलकरांची मध्यरात्र जागवली

नागरिकांप्रमाणे पनवेल शहर पोलीस ठाण्याचे वरिष्ठ पोलीस निरिक्षक नितीन ठाकरे यांनी सुद्धा गणेश मूर्ती दानाचा संकल्प करुन पोलीस विभागात नवा पायंडा पाडला. पनवेल शहर पोलीस ठाण्याच्या आवारात गणेशोत्सव साजरा करण्याची अनेक वर्षांची परंपरा होती. या गणेशोत्सवातील गणेशमूर्ती विसर्जनापूर्वी वाजतगाजत मिरवणूक काढणे त्यानंतर तलावामध्ये विसर्जन करणे ही सुद्धा परंपरा होती. मात्र गणेशमूर्ती दान करण्याची ही पहिलीच वेळ आहे.

हेही वाचा… नेरूळमध्ये अर्ध्या तासात १९.८० मिमी पावसाची नोंद; सायंकाळी बेलापूर नेरुळला पावसाने झोडपले

कर्मचारी वर्गासह वरिष्ठ पोलीस निरिक्षक ठाकरे आणि सहाय्यक पोलीस आयुक्त राजपूत यांनी सुद्धा गणेशमूर्ती मिरवणूकीत ताल धरल्याचे पाहायला मिळाले. महापालिकेच्या आवाहनाला सरकारी कार्यालयांपैकी पोलीस विभागाने सकारात्मक प्रतिसाद दिल्याबद्दल पनवेल पालिकेचे आयुक्त गणेश देशमुख यांनी पनवेल शहर पोलिस ठाण्याचे अधिकारी व कर्मचा-यांंनी घेतलेल्या भूमिकेबद्दल समाधान व्यक्त केले आहे.