11 August 2020

News Flash

 ‘सहज बोलता बोलता’मध्ये शुक्रवारी राहुल देशपांडे 

युवा पिढीतील सर्वात लोकप्रिय गायकाशी संवाद

युवा पिढीतील सर्वात लोकप्रिय गायकाशी संवाद

पुणे : युवा पिढीतील लोकप्रिय गायक राहुल देशपांडे यांच्याशी संवाद साधण्याची संधी शुक्रवारी (१७ जुलै) लाभणार आहे. ‘लोकसत्ता’च्या ‘सहज बोलता बोलता’ या उपक्रमात प्रसिद्ध संवादिनीवादक आणि संगीत अभ्यासक डॉ. चैतन्य कुंटे हे राहुल देशपांडे यांच्याशी गप्पा मारणार आहेत. सायंकाळी पाच वाजता हा दूरचित्र संवाद रंगणार आहे.

‘माझं घराणं माझ्यापासूनच सुरू होतं’ असे अभिमानाने सांगणारे ज्येष्ठ गायक डॉ. वसंतराव देशपांडे यांचे नातू असलेल्या राहुल देशपांडे यांनी लहान वयापासूनच गायनाने रसिकांना मंत्रमुग्ध केले आहे. उषा चिपलकट्टी, पं. गंगाधरबुवा िपपळखरे आणि पं. मधुसूदन पटवर्धन यांच्याकडे शास्त्रीय संगीताचे शिक्षण घेतलेल्या राहुल यांना ज्येष्ठ गायक पं. कुमार गंधर्व यांचे पुत्र मुकुल शिवपुत्र यांची तालीम मिळाली आणि त्यांच्या गायकीला पैलू पाडले गेले. दूरचित्रवाणीवरील ‘सूर ताल’ आणि ‘नक्षत्रांचे देणे’ या कार्यक्रमाद्वारे अफाट लोकप्रिय झालेल्या राहुल देशपांडे यांच्या ऑस्ट्रेलिया, इंग्लंड, सिंगापूर आणि अमेरिकेमध्ये संगीत मैफिली झाल्या आहेत.

डॉ. वसंतराव देशपांडे यांच्या गायकी आणि अभिनयाने रसिकांच्या स्मरणात राहिलेल्या ‘कटय़ार काळजात घुसली’ या संगीत नाटकाचे राहुल देशपांडे यांनी पुनरुज्जीवन केले आहे. वसंतराव यांनी अजरामर केलेली ‘खाँसाहेब’ यांची भूमिका त्यांनी या नाटकातून साकारली. डॉ. वसंतराव देशपांडे यांच्या स्मृतिप्रीत्यर्थ काही वर्षांपासून राहुल देशपांडे ‘वसंतोत्सवा’चे आयोजन करीत आहेत. संगीत रंगभूमीवर मानाचे पान ठरलेल्या ‘संगीत सौभद्र’ आणि ‘संगीत मानापमान’ या नाटकांचे त्यांनी पुनरुज्जीवन केले आहे.

सहभागासाठी : http://tiny.cc/LS_SahajBoltaBolta_17July या लिंकवर नोंदणी करा.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on July 12, 2020 3:59 am

Web Title: rahul deshmukh in loksatta sahaj bolta bolta event zws 70
Next Stories
1 Coronavirus : करोना नियंत्रणामध्ये उणिवाच अधिक
2 वाढत्या टाळेबंदीविरोधात जनमत एकवटले
3 पुण्यात दिवसभरात ८२७ नवे करोनाबाधित, १६ रुग्णांचा मृत्यू
Just Now!
X