कफ सिरपमुळे लहान मुलांचा मृत्यू झाल्यानंतर सरकार अखेर जागे! कंपनीच्या औषधांवर अखेर बंदी

अन्न व औषध प्रशासनाचे पुणे विभागाचे सहआयुक्त गिरीश हुकरे यांनी याबाबत आदेश दिले आहेत. त्यांनी पुणे, सातारा, सांगली, सोलापूर आणि कोल्हापूर जिल्ह्यांतील औषध विक्रेते संघटनांना पत्र लिहिले आहे. त्यात म्हटले आहे की, औषधे व सौंदर्यप्रसाधने कायदा १९४० व त्याअंतर्गत नियम १९४५ नुसार हे पत्र पाठविण्यात येत आहे. जयपूरमधील केसन फार्मा कंपनीच्या कोल्डरीप, नेक्स्ट्रो-डीएस सिरप या खोकल्याच्या औषधांमुळे राजस्थान आणि मध्य प्रदेशात बालकांचा मृत्यू झाल्याची बातमी आहे. यामुळे या कंपनीच्या औषधांचा साठा असल्यास त्याचा वापर तत्काळ बंद करावा. या साठ्याबाबतची माहिती अन्न व औषध प्रशासनाला कळवावी.

लहान मुलांच्या आरोग्याच्या सुरक्षिततेसाठी केंद्रीय आरोग्य आणि कुटुंब कल्याण मंत्रालयाने सर्व राज्ये आणि केंद्रशासित प्रदेशांसाठी खोकल्यावरील औषधे आणि सर्दीवरील औषधांच्या वापराबाबत नवीन मार्गदर्शक तत्त्वे जारी केली आहेत. त्यानुसार बालरोग तज्ज्ञ आणि आरोग्य कर्मचाऱ्यांना लहान मुलांना ही औषधे देताना विशेष काळजी घेण्याचे निर्देश देण्यात आले आहेत. मंत्रालयाने म्हटले आहे की, दोन वर्षांखालील मुलांना कफ आणि सर्दीवरील कोणतीही औषधे देऊ नयेत. तसेच, पाच वर्षांखालील मुलांसाठी ही औषधे सामान्यतः शिफारस केलेली नाहीत. कारण, लहान मुलांमधील तीव्र कफ आणि सर्दीचे बहुतांश आजार स्वतःहून बरे होतात आणि त्यासाठी औषधांची गरज पडत नाही.

सर्व आरोग्य केंद्रे आणि दवाखान्यांनी केवळ उत्तम उत्पादन मानकांनुसार तयार केलेली आणि उच्च दर्जाची खोकल्याची औषधे खरेदी करावीत, असे मार्गदर्शक तत्त्वांमध्ये नमूद आहे. या मार्गदर्शक सूचनांची अंमलबजावणी सर्व दवाखाने, जिल्हा आरोग्य विभाग, औषध वितरण केंद्रे, प्राथमिक आणि सामुदायिक आरोग्य केंद्रे, जिल्हा रुग्णालये तसेच वैद्यकीय शिक्षण संस्थांमध्ये तातडीने करावी, असे निर्देश सर्व राज्ये आणि केंद्रशासित प्रदेशांना देण्यात आले आहेत.

अन्न व औषध प्रशासनाच्या सूचनेनुसार संबंधित कंपनीच्या खोकल्याच्या औषधांबाबत योग्य कार्यवाही केली जात आहे. पुणे जिल्ह्यात सुमारे २२ हजार औषध विक्रेते आहेत. संबंधित कंपनीच्या खोकल्याच्या औषधांमुळे घडलेल्या घटना समजल्या आहेत. आमच्याकडे या कंपनीच्या औषधांचा साठा नाही.- अनिल बेलकर, सचिव, केमिस्ट असोसिएशन ऑफ पुणे डिस्ट्रिक्ट