पिंपरी : ‘सध्या अचानक, ठरावीक भागात, कमी वेळेत जास्त पाऊस पडत आहे. त्यामुळे बदलते वातावरण, नद्यांना येणारा पूर, नदीपात्राची रुंदी, घाटमाथ्यावर आणि शहर परिसरात पडणाऱ्या पावसाची आकडेवारी, अशा सर्व बाबींचा विचार करावा. भविष्यातील परिस्थितीच्या दृष्टीने नदी सुधार प्रकल्पाची आखणी करावी,’ अशी सूचना उपमुख्यमंत्री अजित पवार यांनी अधिकाऱ्यांना केली.
‘जैवविविधता, पर्यावरण समतोल आणि वाढते नागरीकरण याची सांगड घालून सर्वसमावेशक नदीसुधार प्रकल्प राबवताना दोन्ही महापालिकांनी समन्वयाने काम करावे,’ असेही त्यांनी सांगितले.
पवार यांच्या अध्यक्षतेखाली पुणे व पिंपरी-चिंचवड महापालिकेसह पीएमआरडीए, जलसंपदा विभाग, केंद्रीय जल व विद्युत संशोधन केंद्र अशा नदीसुधार प्रकल्पासंबंधित सर्व शासकीय यंत्रणांची संयुक्त बैठक साेमवारी पिंपरी महापालिकेत पार पडली.
पुणे महापालिकेचे आयुक्त नवल किशोर राम, पिंपरीचे आयुक्त शेखर सिंह, पीएमआरडीएचे अतिरिक्त आयुक्त दीपक सिंगला, पोलीस आयुक्त विनयकुमार चौबे, वन विभागाचे प्रादेशिक उपवनसंरक्षक महादेव मोहिते, जलसंपदा विभागाचे मुख्य अभियंता हनुमंत गुनाले, डॉ. हेमंत धुमाळ, कार्यकारी अभियंता दि. म. डूबल, सीएमईचे कर्नल प्रभात सिंग, जलविज्ञान तज्ज्ञ अविनाश सर्वे, केंद्रीय जल व विद्युत संशोधन केंद्राचे संचालक श्री शैलम, शास्त्रज्ञ अनिलकुमार यावेळी उपस्थित होते.
संगणकीय सादरीकरणाद्वारे मुळा नदीवर राबवण्यात येणाऱ्या नदीसुधार प्रकल्पाच्या आराखड्याचे सादरीकरण बैठकीमध्ये करण्यात आले. हा आराखडा राबवताना जलसंपदा विभागाच्या सूचनांचा प्राधान्याने विचार करण्याचे निर्देश पवार यांनी दिले.
समन्वसायाठी समिती
‘नदीसुधार प्रकल्प राबवताना दाेन्ही महापालिका आणि जलसंपदा विभागात समन्वय राहावा. महापालिका अधिकाऱ्यांनी नदीसुधार प्रकल्पाची वेळाेवेळी जलसंपदा विभागाला माहिती द्यावी. त्यांच्या सूचनांनुसार काम करावे. यासाठी महापालिका अधिकारी आणि जलसंपदा विभागाच्या अधिकाऱ्यांची एक स्वतंत्र समिती स्थापन करावी,’ अशी सूचना पवार यांनी केली.
लघुउद्योजकांच्या प्रश्नांवर स्वतंत्र बैठक
कुदळवाडी, चिखली परिसरातील लघुउद्योजकांची जागा विकसित करून औद्योगिक पार्क बनविणे, उद्योजकांना देण्यात आलेल्या सर्व स्थानिक स्वराज्य संस्था कर (एलबीटी) नोटिसा रद्द करणे, सांडपाणी प्रकल्प घातक कचरा विल्हेवाट लावणे, औद्योगिक परिसरात रस्ते व भुयारी गटार योजना राबवणे, अनधिकृत झोपडपट्टी, भंगार दुकाने बंद करण्यासह नाल्यावरील अतिक्रमण हटवणे, सेवा शुल्कवाढ रद्द करण्याबाबत सविस्तर चर्चा झाली. याबाबत स्वतंत्र बैठक घेण्याची ग्वाही पवार यांनी दिली.
स्वीय सहायकांना झापले
बैठक सुरू असताना पवार आणि विधानसभेच्या उपाध्यक्षांच्या स्वीय सहायकांची कुजबूज सुरू होती. त्यामुळे पवार संतापले. त्यांना पवारांनी चांगलेच झापले.
