पुणे : पानशेत येथे फिरायला गेलेल्या तरुणांनी छातीवर दगड मारून स्थानिक तरुणाचा खून करून पसार झाल्याची घटना घडली. याप्रकरणी ग्रामीण पोलिसांनी स्थानिक गुन्हे शाखा आणि वेल्हा पोलिसांच्या मदतीने कारवाई करून पाच जणांना जेरबंद केले.
रोहिदास काळुराम काटकर (वय २४ रा. कादवे, ता. वेल्हे) असे खून झालेल्या तरुणाचे नाव आहे. याप्रकरणी आकाश सुभाष भिसे (वय २१, रा. नऱ्हे), भागवत मुंजाजी आसुरी (वय २०, रा. नऱ्हे), रितेश उत्तम जोगदंड (वय २१) उमेश उर्फ भैय्या रामभाऊ शेळके (वय २१) आणि पांडुरंग भानुदास सोनवणे (वय १९) यांना अटक करण्यात आली आहे. याबाबत अविदास काळुराम काटकर (वय २३) याने वेल्हा पोलीस ठाण्यात फिर्याद दिली आहे, अशी माहिती ग्रामीण पोलीस अधीक्षक संदीपसिंग गिल यांनी दिली.
गिल यांनी दिलेल्या माहितीनुसार, सर्व आरोपी हे मूळचे परभणी जिल्ह्यातील आहे. शहरातील नऱ्हे भागात ते राहतात. १५ जून रोजी दुचाकीवरून सर्वजण पानशेत धरणाकडे फिरण्यासाठी गेले होते. सायंकाळी सात वाजता पुण्याकडे परतत असताना ते एका हॉटेलसमोर सिगारेट ओढण्यासाठी थांबले. त्यावेळी रोहिदास काटकर आणि आरोपींमध्ये वाद झाले. आरोपींनी त्याच्या छातीवर दगड मारला. त्यामुळे त्याचा जागीच मृत्यू झाला. त्यानंतर पाचही आरोपी घटनास्थळावरून दुचाकीवरून पुण्याच्या दिशेने पळून गेले.
‘आरोपी पळून गेलेल्या दुचाकींचा रंग काळा होता. त्यामध्ये एक मोपेड आणि एक मोटारसायकल असल्याचे पोलिसांना तपासात समजले. पोलिसांनी घटनास्थळाच्या परिसरातील सीसीटीव्ही चित्रीकरण तपासले. त्यावेळी दोन्ही वाहने तिथून जाताना पोलिसांना आढळली. ही वाहने नऱ्हे गावाच्या दिशेने गेल्याचे निष्पन्न झाले. तसेच एका वाहनाच्या नंबरप्लेटवरील केवळ अंक दिसून आले. त्यानंतर पोलिसांनी नऱ्हे परिसरात संबंधित वाहनांचा शोध घेतला’, असे गिल यांनी सांगितले.
सबंधित दुचाकी नऱ्हे येथील वाल्हेकर चौकातील एका कपड्याच्या दुकानासमोर आढळली. पोलिसांनी माहिती मिळवून दुचाकीमालकाशी संपर्क करून गुन्ह्याबाबत चौकशी केली. त्यावेळी दुचाकीमालकाने त्याची मोपेड त्याचा मित्र आरोपी आकाश भिसे याला दिल्याचे सांगितले. त्यानंतर पोलिसांनी त्याला ताब्यात घेऊन त्याच्याकडे चौकशी केली. त्याने गुन्हा केल्याची कबुली देत त्याच्यासोबत असणाऱ्या सहकाऱ्यांची नावे सांगितली. पोलिसांनी साथीदारांना देखील ताब्यात घेतले आहे. पोलीस उपनिरीक्षक अमित देशमुख पुढील तपास करीत आहेत.
पोलीस अधीक्षक संदीपसिंह गिल, अतिरिक्त अधीक्षक रमेश चोपडे, उपविभागीय अधिकारी सुनीलकुमार पुजारी यांच्या मार्गदर्शनाखाली स्थानिक गुन्हे शाखेचे निरीक्षक अविनाश शिळीमकर, वेल्हा पोलीस प्रभारी अधिकारी सहायक निरीक्षक नितीन खामगळ, सहायक निरीक्षक राहुल गावडे, पोलीस अंमलदार सचिन घाडगे, अजित भुजबळ, मंगेश भगत, हनुमंत पासलकर, अतुल डेरे, अमोल शेडगे, रामदास बाबर, राहुल घुबे, प्रसन्न घाडगे, वेल्हा पोलीस ठाण्याचे उपनिरीक्षक अमित देशमुख, अंमलदार ज्ञानदीप धिवार, पंकज मोघे, आकाश पाटील, राजेंद्र आवदे, अजय गार्डी, सोमनाथ जाधव, युवराज सोमवंशी यांनी ही कारवाई केली.
