पुणे : गणेशोत्सवाच्या काळात सुरक्षेच्या दृष्टीने शहराच्या मध्यवर्ती भागातील प्रमुख गणेश मंडळांसह उपनगरांतील महत्त्वाच्या मंडळांचे जिओ मॅपिंग करण्याचा महत्त्वपूर्ण निर्णय शहर पोलीस दलाने घेतला आहे. त्यामुळे आपत्कालीन परिस्थितीत पोलिसांना मंडळांची माहिती, ठावठिकाणा तत्काळ उपलब्ध होणार असून, दुर्दैवाने अनुचित घटना घडली, तर सुरक्षा यंत्रणांना वेळेत प्रतिसाद देणे शक्य होणार आहे.
मध्यवर्ती भागातील कसबा गणपती, श्रीमंत भाऊसाहेब रंगारी ट्रस्ट, श्रीमंत दगडूशेठ हलवाई गणपती ट्रस्ट, अखिल मंडई गणपती, तुळशीबाग गणेशोत्सव मंडळ यांसारख्या मंडळांमध्ये गणरायाचे दर्शन घेण्याबरोबरच देखावे पाहण्यासाठी नागरिकांची मोठ्या प्रमाणावर गर्दी होते. त्याचबरोबर उपनगरांतील नामांकित मंडळेही गणेशभक्तांच्या आकर्षणाचे केंद्र असतात. त्यामुळे पोलिसांनी यंदा सर्वच महत्त्वाच्या मंडळांना जिओ मॅपिंगच्या माध्यमातून सुरक्षाकवच दिले आहे, अशी माहिती पोलीस आयुक्त अमितेश कुमार यांनी गुरुवारी दिली. बालगंधर्व कलादालन येथे पुणे श्रमिक पत्रकार संघाच्या वतीने भरविण्यात आलेल्या वृत्तपत्र छायाचित्रकारांच्या छायाचित्रांचा समावेश असलेल्या प्रदर्शनाला अमितेश कुमार यांनी भेट दिली. त्या वेळी त्यांनी पत्रकारांशी संवाद साधला.
अमितेश कुमार म्हणाले, ‘या उपक्रमांतर्गत दररोज संबंधित स्थानिक पोलीस अधिकारी आणि कर्मचारी मंडळांना भेट देऊन त्यांच्या भेटीची नोंद प्रणालीमध्ये करतील. जिओ मॅपिंगमुळे प्रत्येक मंडळाचे ठिकाण, प्रवेशद्वार, गर्दीचे केंद्रबिंदू, तसेच आपत्कालीन परिस्थितीत वापरता येणारे पर्यायी मार्ग याची माहिती उपलब्ध होईल. त्यामुळे पोलिसांना सुरक्षेची आखणी करण्यामध्ये मोठी मदत होणार आहे.’
या उपक्रमामुळे पोलिसांना दररोजची ‘डिजिटल हजेरी’ अनिवार्य झाली आहे. म्हणजे पोलिसांनी प्रत्यक्ष मंडळाला भेट दिली, की त्याची नोंद ऑनलाइन प्रणालीमध्ये होणार आहे. त्यामुळे जबाबदारी अधिक पारदर्शक राहणार असून, तसेच मंडळांच्या सुरक्षेवर सतत लक्ष ठेवणे शक्य होईल. गणेशोत्सवात मंडळांचे देखावे पाहण्यासाठी होणारी गर्दी, मिरवणुका, तसेच रात्री उशिरापर्यंत सुरू राहणारे कार्यक्रम लक्षात घेता पोलिसांनी घेतलेली ही तांत्रिक मदत मोठ्या प्रमाणावर उपयोगी ठरणार आहे, असे सूत्रांनी सांगितले.
गणेशोत्सवात दहाव्या दिवसापर्यंत दर्शन आणि देखावे पाहण्यासाठी नागरिकांची गर्दी अपेक्षित आहे. या काळात गर्दीच्या व्यवस्थापनासाठी प्रत्येक मंडळ आणि चौकनिहाय नियोजन करण्यात आले आहे. जिथे जास्त गर्दी तिथे जास्त बंदोबस्त तैनात करण्यात येणार असून, कमी गर्दी असते, तेथेही बंदोबस्त नेमला आहे. त्यासह महिलांच्या सुरक्षेच्या दृष्टीनेही योजना केलेली आहे.
