कल्याणमधील विस्तारित खडकपाडा मेट्रो-५ कामाची लवकरच निविदा प्रक्रिया, उपमुख्यमंत्री एकनाथ शिंदे यांची माहिती

एमसीएचआय कल्याण शाखेतर्फे गृहोत्सव प्रदर्शनाचे फडके मैदान येथे आयोजन केले होते. या प्रदर्शनाचा समारोप उपमुख्यमंत्री एकनाथ शिंदे यांच्या हस्ते झाला. यावेळी व्यासपीठावर आमदार विश्वनाथ भोईर, आयुक्त डाॅ. इंदुराणी जाखड, पोलीस उपायुक्त अतुल झेंडे, एमसीएचआय कल्याण शाखेचे अध्यक्ष राजेश गुप्ता, सचिव सुनील चव्हाण, माजी अध्यक्ष रवी पाटील, शिवसेना जिल्हाप्रमुख अरविंद मोरे उपस्थित होते.

ठाणे-भिवंडी-कल्याण ते तळोजा हा ठाणे जिल्ह्यातील महत्वाचा टप्पा मेट्रो मार्गाने जोडला जाणार आहे. यामुळे गर्दीचे विभाजन होऊन नागरिकांना सुखकर प्रवास करणे शक्य होणार आहे. कल्याणमधील नागरिकांच्या मागणीचा विचार करून, आणि शिवसेनेचे शहरप्रमुख रवी पाटील यांनी केलेल्या पाठपुराव्यामुळे कल्याणमधील मेट्रो मार्ग खडकपाडा, बिर्ला महाविद्यालय पर्यंत विस्तारित करण्यात आला आहे. कल्याण शहराच्या विस्तारित मेट्रो मार्गाचा शहाड परिसरातील नागरिकांना लाभ होणार आहे. कल्याणमधील विस्तारित खडकपाडा मेट्रो मार्गाची निविदा प्रक्रिया लवकरच सुरू केली जाईल, असा विश्वास उपमुख्यमंत्री एकनाथ शिंदे यांनी व्यक्त केला.

कल्याण डोंबिवली शहराची लोकसंख्या वाढत आहे. वाढत्या नागरीकरणासाठी भविष्यातील या शहरांच्या पाणी प्रश्नाचा विचार करून काळू धरणाचा विचार करण्यात आला आहे. ठाणे जिल्ह्यातील अनेक शहरांची तहान काळू धरण भागविणार आहे. काळू धरणाचे काम लवकर पूर्ण व्हावे. यासाठी शासन प्रयत्नशील आहे. काळू धरणामध्ये वन विभागाची जमीन बाधित होत आहे. या जमिनीच्या बदल्यात ३५० कोटी रूपये वन विभागाला भरणा करण्यात आले आहेत, अशी माहिती उपमुख्यमंत्र्यांनी दिली.नवी मुंबईला मोरबे धरणाचा पाणी पुरवठा सुरू झाल्यानंतर नवी मुंबईच्या वाट्याचे १४० दशलक्ष लीटर पाणी कल्याण, डोंबिवली शहरांना देण्याचा विषय अनेक वर्ष प्रलंबित आहे. हा विषयही लवकर मार्गी लागेल, असे उपमुख्यमंत्री एकनाथ शिंदे यांनी सांगितले. कल्याण, डोंबिवली शहरांमधील पाण्याचा प्रश्न लवकरच मार्गी लागेल. कल्याण शहरातील मेट्रो मार्गाच्या विस्तारित कामाची निवीदा प्रक्रिया लवकरच सुरू केली जाणार आहे. विकासाची ही सकारात्मक पावले या शहराचा चेहरा बदलणार आहेत. एकनाथ शिंदे उपमुख्यमंत्री.