Jitendra awhad demand Eknath shinde kalwa bridge traffic jam issue आव्हाडांची एकनाथ शिंदेंकडे मागणी म्हणाले, "कळव्याचा खाडी पूल…"

ठाणे बेलापूर मार्गावरुन कळवा, विटावा मार्गे नवी मुंबईच्या दिशेने वाहतुक करण्यासाठी कळवा नाका येथून हजारो वाहने वाहतुक करतात.

आव्हाडांची एकनाथ शिंदेकडे मागणी म्हणाले, "कळव्याचा खाडी पूल..." (Photo Credit - X)

ठाणे : उपमुख्यमंत्री एकनाथ शिंदे यांच्याकडे राष्ट्रवादीचे नेते (शरद पवार गट) आमदार जितेंद्र आव्हाड यांनी महत्त्वाची मागणी केली आहे. कळवा येथे काही वर्षांपूर्वीच उभारण्यात आलेला कळवा खाडी उड्डाणपूल पटणी नाकापर्यंत न्यावा अशी मागणी त्यांनी शिंदे यांच्याकडे केली आहे. हा प्रस्ताव मी यापूर्वीच सादर केला होता असाही दावा त्यांनी केला.

ठाणे बेलापूर मार्गावरुन कळवा, विटावा मार्गे नवी मुंबईच्या दिशेने वाहतुक करण्यासाठी कळवा नाका येथून हजारो वाहने वाहतुक करतात. कळवा येथील जुन्या खाडी पूलावर मोठ्याप्रमाणात वाहतुक कोंडी होत होती. त्यामुळे येथे तिसरा खाडी उड्डाणपूल उभारण्यात आला आहे. ठाणे येथून कळवा, विटावा, नवी मुंबईच्या दिशेने वाहतुक करणाऱ्या नोकरदार, वाहन चालकांसाठी हा पूल वाहतुकीस अत्यंत महत्त्वाचा आहे. ठाणे कारागृह, ठाणे पोलीस आयुक्तालय कार्यालय येथून सुरु झालेला हा उड्डाणपूल छत्रपती शिवाजी महाराज रुग्णालय आणि कळवा नाका येथे पूर्ण होतो. एकाचवेळी कळवा, विटावा भागातील वाहनांची वाहतुक वाढल्यास सकाळी खाडी पूलावर मोठ्याप्रमाणात वाहतुक कोंडी होते.

या वाहतुक कोंडीच्या समस्ये विषयी राष्ट्रवादीचे (शरद पवार गट) नेते आमदार जितेंद्र आव्हाड यांनी ठाणे वाहतुक शाखेच्या पोलीस उपायुक्तांची भेट घेतली. तसेच त्यांच्याकडून काय उपाययोजना केल्या जात आहेत याची माहिती आव्हाड यांनी घेतली. त्यानंतर आव्हाड यांनी समाजमाध्यमावर प्रसारित केलेल्या एका चित्रीकरणात दावा केला आहे की, कळवा येथील उड्डाणपूल पटणी नाका पर्यंत नेण्याची मागणी मी केली होती. हा प्रस्ताव मी केला होता. उपमुख्यमंत्री एकनाथ शिंदे यांना विनंती आहे, ते मंत्रिमंडळात आहे. त्यांचा मुलगा तेथील खासदार आहे. एमएमआरडीएने तो उड्डाणपूल बांधावा असा आमचा प्रस्ताव होता. तत्कालीन मंत्री योगेश सागर यांनी विधानसभेत आश्वासन दिले होते. ते दौऱ्यासाठीही तेथे आले होते. या प्रस्तावाचा पाठपुरावा आम्ही करत आहोत. परंतु एकनाथ शिंदे यांनी या प्रस्तावाकडे लक्ष दिले तर त्यास मंजूरी मिळेल. त्यामुळे कळवेकरांच्या डोक्याचा ताप कमी होईल असे आव्हाड यांनी सांगितले.

कळव्यातील वाढत्या ट्रॅफिकच्या संदर्भात आज पंकज शिरसाठ (उपायुक्त वाहतूक विभाग) यांची भेट घेतली आणि कळव्यातील वाहतुकीवर कसे नियंत्रण मिळवता येईल? वाहतुक सुधारण्यासाठी कोणत्या उपाययोजना करता येतील? याबाबत चर्चा केली आणि Ptsd सूचना देखील केल्या.यावेळी माझ्यासोबत ठाणे जिल्हाध्यक्ष… pic.twitter.com/VFBvSWshUi
— Dr.Jitendra Awhad (@Awhadspeaks) October 17, 2025

कळव्यात कावेरी सेतूचा निर्माण झाला नसता तर कळवा ते रेतीबंदर गाठण्यास दोन तास लागले असते असेही ते म्हणाले. कळव्यात विरुद्ध दिशेने वाहतुक होते. अनेक ठिकाणी वाहतुक कोंडी होत आहे. कळव्यातील वाहतुकीवर सर्वेक्षण करुन दोन दिवसांत मार्ग काढू असे आश्वासन पोलिसांनी दिल्याचेही आव्हाड यांनी स्पष्ट केले.

आव्हाडांची एकनाथ शिंदेंकडे मागणी म्हणाले, “कळव्याचा खाडी पूल…”