Ahmedabad plane crash : अहमदाबादमध्ये एअर इंडियाचे विमान एआय-171 चा अपघात झाला आहे. या विमानात एकूण २४२ प्रवासी अहमदाबादहून लंडनला जात होते. मात्र या अपघातात फक्त एक प्रवासी वगळता इतर सर्वांचाच मृत्यू झाल्याचे म्हटले जात आहे. दरम्यान, आता याच विमानात प्रवास करणाऱ्या खुशबू नावाच्या नवविवाहित महिलेची काळीज पिळवटून टाकणारी माहिती समोर येत आहे. लग्नानंतर पाच महिन्यांनी ती तिच्या पतीला भेटायला जात होती. मात्र मध्येच विमान अपघाताच्या रुपात तिच्यावर काळाने घाला घातला. दरम्यान खूशबूला एअरपोर्टवर सोडायला आलेल्या वडिलांनी तिच्यासोबत एक फोटो काढला होता त्यानंतर तो व्हॉट्सअॅप स्टेटसला ठेवला..अन् काही क्षणातच हा व्हॉट्सअॅप स्टेटस शेवटचा ठरला. याचा फोटो सध्या सोशल मीडियावर व्हायरल होत असून वाचून तुमच्याही डोळ्यांत पाणी येईल.
या फोटोमध्ये तुम्ही पाहू शकता, खूशबूच्या वडिलांनी खूशबूला एअरपोर्टवर सोडायला आले तेव्हा तिच्यासोबत एक फोटो काढला होता त्यानंतर तो व्हॉट्सअॅप स्टेटसला ठेवला. यावेळी त्यांनी “आशिर्वाद खूशबू बेटा…गोईंग टू लंडन” असं फोटोखाली लिहलं होतं. यावरुन कळतंय की खूशबू लंडनला निघालेली याचा वडिलांनी किती आनंद झाला होता. वडिलांचं मुलीवरचं प्रेम काय असतं हे वेगळं सांगायची गरज नाही. मात्र ज्या लेकीच्या भविष्याची स्वप्न एक बाप रंगवत होता त्याचा असा शेवट होईल असा कुणी विचारही केला नसेल.
खुशबू एक नवविवाहिता याच विमानात होती. खुशबू मुळची राजस्थानच्या बलोतारा जिल्ह्यातली. तिचं लग्न याच वर्षी जानेवारी महिन्यात मनफुल सिंग याच्याशी झालं होतं. तिचा पती लंडनमध्ये शिकतो आहे. ती त्याला भेटण्यासाठी पहिल्यांदाच याच विमानाने लंडनला चालली होती. लग्नानंतर या दोघांची पहिल्यांदाच भेट होणार होती पण त्याआधीच खुशबूचा विमान अपघातात मृत्यू झाला. यावेळी तिच्या वडिलांनी ठेवलेलं व्हॉट्सअॅप स्टेटसची सर्वत्र चर्चा आहे.
पाहा खूशबूच्या वडिलांचं व्हॉट्सअॅप स्टेटस
राजस्थानची विवाहिता खुशबूचा मृत्यू
राजस्थानचे ११ जण या विमानात होते. त्यापैकीच एक खुशबूही होती. या ११ जणांपैकी दोघंजण हे शेफ म्हणून काम करण्यासाठी चालले होते. दुपारी १ वाजून ३८ मिनिटांनी विमानाचा अपघात झाला. वैमानिकाने थेट Mayday चा मेसेज दिला. त्यावेळी विमान ८०० फुटांहून अधिक उंचीवर पोहचलं होतं. त्यानंतर ते कोसळलं. याच अपघातात ज्या प्रवाशांचा मृत्यू झाला त्यात खुशबूचा समावेश होता. खुशबू मदन सिंग राजपुरोहित यांची मुलगी होती. ते मूळचे राजस्थानचे आहेत. जानेवारीत खुशबूचं लग्न झालं होतं. लग्नानंतर ती पहिल्यांदाच नवऱ्याला भेटायला चालली होती. मात्र तिचा मृत्यू झाला. ज्यामुळे तिच्या कुटुंबावर शोककळा पसरली आहे. एनडीटीव्हीने हे वृत्त दिलं आहे.
