सवंत्सर २०८२ शुभ संकेताचे! मुहूर्ताला सेन्सेक्सची ६३ अंशांची कमाई…

लक्ष्मीपूजनानिमित्त झालेल्या मुहूर्ताच्या विशेष व्यवहारात सेन्सेक्स ६२.९७ अंशांनी तर निफ्टी २५.४५ अंशांनी वधारल्याने, नव्या संवत्सर २०८२ ची सुरुवात भांडवली बाजारात शुभ संकेताने झाली.

Written by लोकसत्ता टीम

मुंबई

October 21, 2025 22:11 IST

india stock markets positive samvat 2082 start diwali muhurat trading sensex gains BSE NSE

शुभ सुरुवात! मुहूर्ताच्या व्यवहारात सेन्सेक्स ६३ अंशांनी वधारला.

मुंबई : लक्ष्मीपूजनानिमित्त भांडवली बाजारात मंगळवारी दुपारी तासाभरासाठी झालेल्या मुहूर्ताच्या विशेष व्यवहारात प्रमुख निर्देशांक सेन्सेक्स आणि निफ्टी वधारले. जागतिक पातळीवरील मजबूत संकेत आणि देशांतर्गत आघाडीवरील सुधारणांमुळे नव्याने सुरू झालेल्या २०८२ सवंत्सराची सकारात्मक सुरुवात झाली.

दुपारी मुहूर्ताचे व्यवहार आटोपले तेव्हा सेन्सेक्स ६२.९७ अंशांनी वाढून ८४,४२६.३४ या पातळीवर स्थिरावला. प्रतीकात्मक सत्रादरम्यान, सेन्सेक्सने ८४,६६५.४४ चा उच्चांक आणि ८४,२८६.४० या नीचांकी पातळीला स्पर्श केला. तर निफ्टी निर्देशांक २५.४५ अंशांच्या कमाईसह २५,८६८.६० वर बंद झाला.

निफ्टीमधील आघाडीच्या ५० कंपन्यांपैकी २४ कंपन्यांचे समभाग वधारले होते. यंदा दुपारी १.४५ मिनिटांपासून २.४५ मिनिटांपर्यँत भांडवली बाजारात व्यवहार सुरू होते. परंपरेप्रमाणे मुहूर्ताला प्रातिनिधिक स्वरूपाची का होईना समभाग खरेदी करण्याचा गुंतवणूकदारांमध्ये प्रघात रुळला आहे.

हेही वाचा

यंदा दिवाळीत सहा लाख कोटींची उलाढाल…

मागील दिवाळी ते यंदाच्या दिवाळीपर्यंत सेन्सेक्स आणि निफ्टी हे निर्देशांक अनुक्रमे ६.२६ टक्के आणि ६.७६ टक्के असे वाढले आहेत. सोमवारी मावळलेल्या संवत्सर २०८१ मध्ये सेन्सेक्सने ४,९७४.३१ अंशांची भर घातली, तर निफ्टी निर्देशांक १,६३७.८ अंशांनी वधारला आहे.
जागतिक स्तरावरील प्रतिकूल परिस्थितीमध्ये सोने आणि चांदीच्या किमती सलग दुसऱ्या वर्षी वाढल्या तरीही, भांडवली बाजारांनी सलग आठव्या मुहूर्ताच्या विशेष व्यवहारात वाढ नोंदवली.

मुंबई शेअर बाजारातील सूचिबद्ध कंपन्यांचे बाजार भांडवल ४७१ लाख कोटी (५.३४ ट्रिलियन डॉलर) रुपयांवर पोहोचले आहे. याआधी २७ सप्टेंबर २०२४ रोजी बाजारभांडवलाने ४७८ लाख कोटी रुपयांचे शिखर गाठले होते. सेन्सेक्समधील आघाडीच्या कंपन्यांमध्ये बजाज फिनसर्व्ह १.४२ टक्क्यांनी वधारला. त्यापाठोपाठ ॲक्सिस बँक ०.८० टक्क्यांनी, इन्फोसिस ०.७२ टक्क्यांनी, महिंद्र अँड महिंद्र ०.६० टक्क्यांनी, टाटा मोटर्स ०.५५ टक्क्यांनी, बजाज फायनान्स ०.५३ टक्क्यांनी आणि टाटा स्टील ०.५२ टक्क्यांनी वधारले.

तर कोटक महिंद्र बँक, आयसीआयसीआय बँक, एचसीएल टेक्नॉलॉजीज, भारती एअरटेल, मारुती सुझुकी इंडिया, ट्रेंट लिमिटेड आणि टाटा कन्सल्टन्सी सर्व्हिसेस यांनी गुंतवणूकदारांची निराशा केली.

हेही वाचा

रुपयाला सावरण्यासाठी ऑगस्टमध्ये ७.७ अब्ज डॉलर खर्ची…

सवंत्सर २०८१ मध्ये अनेक भू-राजकीय प्रतिकूल परिस्थितीमुळे भांडवली बाजाराने इतर मालमत्ता वर्गांच्या तुलनेत कमी कामगिरी केली. मात्र, सवंत्सर २०८२ साठीचे भविष्य उज्ज्वल दिसते. भारत सेवा निर्यातीसाठी जागतिक केंद्र म्हणून उदयास आला आहे, तर जीएसटी सुधारणांच्या अंमलबजावणीचे व्यापक स्वागत झाले आहे. – आशीष कुमार चौहान, व्यवस्थापकीय संचालक आणि मुख्य कार्यकारी अधिकारी, राष्ट्रीय शेअर बाजार (एनएसई).

सवंत्सर २०८२ सकारात्मक असेल. मोटार वाहन विक्री, वाढता उपभोग आणि सकल देशांतर्गत उत्पादनात (जीडीपी) वाढ ही अर्थव्यवस्थेची गती दर्शवत आहे. वाढ अशीच सुरू राहणार असून या काळात बाजारभांडवल ५०० लाख कोटी रुपयांचा टप्पा गाठेल. – सुंदररामन रामामूर्ती, व्यवस्थापकीय संचालक आणि मुख्य कार्यकारी अधिकारी, मुंबई शेअर बाजार (बीएसई).