आचारसंहितेचे उल्लंघन केल्यामुळे आम आदमी पक्षाचे निमंत्रक अरविंद केजरीवाल आणि पक्षाचे नेते कुमार विश्वास यांच्यासह दहा जणांविरूद्ध गुन्हा दाखल करण्यात आला आहे. गौरीगंज पोलीस ठाण्यामध्ये या दोघांविरोधात गुन्हा दाखल करण्यात आला.अमेठीमध्ये कुमार विश्वास यांनी केलेल्या प्रचाराचा व्हिडिओ बघितल्यानंतर त्यांच्याविरोधात गुन्हा दाखल करण्याचा निर्णय घेण्यात आल्याचे निवडणूक अधिकारी नविनकुमार सिंग यांनी सांगितले. केजरीवाल आणि कुमार विश्वास यांनी प्रतिबंधात्मक आदेशांचे उल्लंघन करून पूर्वपरवानगी न घेता रस्त्यावर सभा घेतली, असा ठपका त्यांच्यावर ठेवण्यात आला आहे. याआधी गेल्या शुक्रवारी कुमार विश्वास यांच्यासह १०० जणांवर गौरीगंज पोलीस ठाण्यात धरणे आंदोलन केल्याबद्दल गुन्हा दाखल करण्यात आला होता. प्रियांका गांधी, राहुल गांधी यांच्याविरुद्ध गुन्हा दाखल करावा, या मागणीसाठी कुमार विश्वास यांनी गौरीगंज पोलीस ठाण्यात धरणे आंदोलन केले होते.
