scorecardresearch

“तुझे नाव मोहम्मद आहे का, आधार कार्ड दाखव”; मुस्लिम समजून वृद्धाची हत्या,VIDEO व्हायरल झाल्यानंतर गुन्हा दाखल

मृत व्यक्तीला स्वतःची ओळख सांगता न आल्यामुळे ही घटना घडली, अशी प्रतिक्रिया गृहमंत्र्यांनी दिली आहे

Man murdered by asking name in Madhya Pradesh murder case registered when video went viral
(फोटो सौजन्य – ट्विटर)

राजस्थानला लागून असलेल्या मध्य प्रदेशातील मनसा (नीमच) येथे मानवतेला धक्का देणारी घटना समोर आली आहे. एका वृद्धाला मुस्लिम असल्याच्या संशयावरून बेदम मारहाण करण्यात आली. मध्य प्रदेशातील मनसा येथे भाजपाशी संबंधित आणखी एका व्यक्तीने एका व्यक्तीला बेदम मारहाण केली. मृत व्यक्तीच्या मारहाणीचा व्हिडिओ व्हायरल झाल्यानंतर पोलिसांनी खुनाचा गुन्हा दाखल केला. आरोपी हा भाजपाच्या माजी नगरसेविकेचा पती असल्याचे सांगण्यात येत असून त्याला अद्याप अटक करण्यात आलेली नाही.

रतलाम जिल्ह्यात राहणारे एक कुटुंब १५ मे रोजी राजस्थानमधील चित्तोडगड येथील किल्ल्यावर भेरूजीची पूजा करण्यासाठी गेले होते. दरम्यान, भंवरलाल जैन हे दुसऱ्या दिवशी कुटुंबीयांना न सांगता गायब झाले. बराच शोध घेऊनही ते सापडले नाहीत तेव्हा त्यांच्या कुटुंबीयांनी चित्तौडगड पोलीस ठाण्यात हरवल्याची तक्रार दाखल केली.

त्यानंतर गुरुवारी मनसा येथील रामपुरा रोडवरील मारुती शोरूमजवळ एका वृद्धाचा मृतदेह आढळून आला असून त्याची ओळख ६५ वर्षीय भंवरलाल जैन अशी झाली. पोलिसांनी मृताचा फोटो क्लिक करून सोशल मीडियावर टाकला. माहिती मिळताच मृताचे कुटुंबीय मनसा येथे आले आणि शवविच्छेदनानंतर कुटुंबीय भंवरलाल यांचा मृतदेह त्यांच्या गावी घेऊन गेले, तेथे त्यांच्यावर विधिवत अंत्यसंस्कार करण्यात आले.

मृत वृद्धाचा भाऊ राकेश जैन यांच्या मोबाईलमध्ये हा व्हिडिओ आल्याने या प्रकरणाला नवा ट्विस्ट आला. सोशल मीडियावर व्हायरल झालेल्या या व्हिडिओमध्ये एक व्यक्ती त्यांचा भाऊ भंवरलाल जैन यांना कानाखाली मारताना दिसत आहे. व्हिडिओमध्ये तो माणूस त्या वृद्धाला विचारताना ऐकू येतो, “तुझे नाव मोहम्मद आहे का? जावरा (रतलाम) येथून आला आहे का? चल तुझं आधार कार्ड दाखव.” त्याचवेळी भवरलाल दयनीय अवस्थेत २०० रुपये घे, असे म्हणताना दिसत आहेत.

हा व्हिडिओ पाहताच त्यांनी गावातील लोकांसह मोठ्या संख्येने मनसा पोलीस ठाणे गाठून आरोपीला अटक करून त्याच्यावर कठोर कारवाई करण्याची मागणी केली. मनसा पोलिसांनी व्हिडिओ तपासला आणि त्याच्यावर हल्ला करणाऱ्या व्यक्तीची ओळख पटवली.

या घटनेबाबत काँग्रेसने भाजपाच्या शिवराज सिंह चौहान सरकारला घेरले आहे. माजी मुख्यमंत्री आणि प्रदेश काँग्रेस अध्यक्ष कमलनाथ, माजी मुख्यमंत्री आणि राज्यसभा सदस्य दिग्विजय सिंह, माजी प्रदेश काँग्रेस अध्यक्ष अरुण यादव यांच्यासह अनेक नेत्यांनी हा व्हिडिओ ट्विट करून सरकारला सवाल केला आहे. त्याच वेळी, गृहमंत्री नरोत्तम मिश्रा यांनी माध्यमांना सांगितले की, “मृत व्यक्तीला स्वतःची ओळख सांगता न आल्यामुळे ही घटना घडली. आरोपींची ओळख पटली असून त्यांच्याविरुद्ध गुन्हा नोंदवण्यात आला आहे.”

मराठीतील सर्व देश-विदेश ( Desh-videsh ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Web Title: Man murdered by asking name in madhya pradesh murder case registered when video went viral abn

ताज्या बातम्या