Hasan Mushrif : “सत्ता आल्यास मी उपमुख्यमंत्री होणार”, मुश्रीफांचा दावा; अजित पवारांचा पत्ता कट? मुख्यमंत्रिपदाबद्दल मोठं वक्तव्य

दरम्यान, अजित पवारांचा पक्ष दोन-दोन उपमुख्यमंत्रिपदं मिळावी यासाठी प्रयत्न करत असल्याची चर्चा रंगू लागली आहे. या पक्षातील वरिष्ठ नेते हसन मुश्रीफांच्या एका वक्तव्यामुळे या चर्चांनी जोर धरला आहे.

हे ही वाचा >> Jitendra Awhad : जितेंद्र आव्हाड शरद पवार गटातील नेत्याशी भिडले, माध्यमांसमोर हमरीतुमरी; अंतर्गत वाद चव्हाट्यावर, VIDEO व्हायरल

हसन मुश्रीफांचं मोठं वक्तव्य

“महाराष्ट्रात महायुतीची सत्ता आल्यास मी उपमुख्यमंत्री होईन”, असं वक्तव्य राज्याचे वैद्यकीय शिक्षणमंत्री व राष्ट्रवादी काँग्रेस पार्टीचे (अजित पवार) कागल विधानसभेचे आमदार हसन मुश्रीफ यांनी केलं आहे. कागलमधील एका प्रचारसभेत बोलत असताना मुश्रीफांनी हे वक्तव्य केलं आहे. हसन मुश्रीफ हे पुन्हा एकदा कागलमधून विधानसभा निवडणुकीच्या रिंगणात उतरले आहेत. दरम्यान, स्वतःचा प्रचार करत असताना कागलमध्ये आयोजित एका प्रचारस्भेत त्यांनी मुख्यमंत्री व उपमुख्यमंत्रिपदाबाबत भाष्य केलं आहे.

मुश्रीफ नेमकं काय म्हणाले?

हसन मुश्रीफ म्हणाले, “विधानसभा निवडणुकीत महायुती विजयी होऊन आपली राज्यात सत्ता येणार आहे. कारण लाडक्या बहिणींनी तसं ठरवलं आहे. राज्यात महायुतीचं सरकार आणायचं असं त्यांनी ठरवलं आहे. राज्यात पुन्हा एकदा आमची सत्ता आली तर याहीपेक्षा अधिक चांगलं खातं मला मिळेल की नाही?”

हे ही वाचा >> भाजपाची २५ उमेदवारांची तिसरी यादी जाहीर; घाटकोपर, बोरीवली, वर्सोव्याचा समावेश!

राज्याला तीन उपमुख्यमंत्री मिळणार?

मुश्रीफांच्या या वक्तव्यानंतर त्यांच्या कार्यकर्त्यांनी ‘भावी मुख्यमंत्री… हसन मुश्रीफ…’ अशा घोषणा देण्यास सुरुवात केली. त्यावर मुश्रीफांनी कार्यकर्त्यांना थांबवलं. ते म्हणाले, “नाही, मुख्यमंत्री नाही होणार, झालो तर मी उपमुख्यमंत्री होऊ शकेन. राज्यात दोन उपमुख्यमंत्री आहेत, काही ठिकाणी तीन, मग आपल्या राज्यात तीन उपमुख्यमंत्री का होऊ शकत नाहीत”.