पहिला वन-डे सामना जिंकून मालिकेची धडाकेबाज सुरुवात करणाऱ्या ऑस्ट्रेलियाने दुसऱ्याच सामन्यात निराशा केली आहे. इंग्लंडला २३१ धावांवर रोखल्यानंतर चांगली सुरुवात केल्यानंतरही ऑस्ट्रेलियाचा डाव गडगडला आणि यजमान इंग्लंडने २४ धावांनी सामना जिंकत मालिकेत १-१ अशी बरोबरी साधली आहे. विजयासाठी २३२ धावांचा पाठलाग करताना ऑस्ट्रेलियाचा संघ जोफ्रा आर्चर, ख्रिस वोक्स आणि सॅम करन यांच्या भेदक माऱ्यासमोर २०७ धावांपर्यंतच मजल मारु शकला. अवश्य वाचा - कांगारुंची हाराकिरी, इंग्लंडविरुद्ध हातातला सामना गमावला सलामीवीर डेव्हिड वॉर्नर आणि तिसऱ्या क्रमांकावर आलेला स्टॉयनिस झटपट माघारी परतले. यानंतर कर्णधार फिंच आणि लाबुशेन यांनी भागीदारी करुन ऑस्ट्रेलियाचा डाव सावरला. फिंचने फटकेबाजी करत ऑस्ट्रेलियाची अधिक पडझड होणार नाही याची काळजी घेतली. लाबुशेनसोबत भागीदारीदरम्यान फिंचने आपलं अर्धशतकही साजरं केलं. ७३ धावांवर खेळत असताना ख्रिस वोक्सचा टप्पा पडून आत आलेला चेंडू फिंचला समजलाच नाही आणि काही कळायच्या आतच त्याची दांडी गुल झाली. पाहा हा व्हिडीओ. THE WIZARD!! Scorecard/Videos: pic.twitter.com/9hK7rmwm41 — England Cricket (@englandcricket) September 13, 2020 फिंच माघारी परतल्यानंतर ऑस्ट्रेलियाच्या डावाची घसरगुंडी उडाली. मधल्या फळीत कॅरीचा अपवाद वगळता एकही ऑस्ट्रेलियन फलंदाज तग धरु शकला नाही. जोफ्रा आर्चर, ख्रिस वोक्स आणि सॅम करन यांनी भेदक मारा करत ऑस्ट्रेलियाच्या डावाला खिंडार पाडत संघाच्या विजयावर शिक्कामोर्तब केलं.