IND vs AFG: अफगाणिस्तान सामन्याआधी BCCIने दिले अ’शुभ’ संकेत; गिलच्या दुखापतीने टीम इंडियाची वाढली डोकेदुखी

बीसीसीआयने वैद्यकीय अपडेट जारी केले

बीसीसीआयने शुबमनबाबत वैद्यकीय अपडेट दिले आहे. बोर्डाने ट्वीट करून लिहिले की, “टीम इंडियाचा फलंदाज शुबमन गिल ९ ऑक्टोबरला टीमसोबत दिल्लीला जाणार नाही. आयसीसी पुरुष क्रिकेट विश्वचषकातील भारतीय संघाचा पहिला सामना ऑस्ट्रेलियाविरुद्ध चेन्नईत खेळला जात असताना हा सलामीचा फलंदाज खेळू शकला नाही. ११ ऑक्टोबर रोजी दिल्लीत होणाऱ्या अफगाणिस्तानविरुद्धच्या टीम इंडियाच्या पुढील सामन्यातही तो खेळू शकणार नाही. शुबमन चेन्नईत राहणार असून तो वैद्यकीय पथकाच्या देखरेखीखाली असेल.”

शुबमनची तब्येत बिघडली आहे, तो आजारातून अजूनही सावरत आहे

अलीकडच्या काळात, भारताचा एकदिवसीय क्रिकेटमधला स्टार फलंदाज शुबमन हा तापाने त्रस्त आहे. डेंग्यूसाठी चाचणी केली जाणार होती, परंतु बीसीसीआयकडून यासंदर्भात आलेल्या माहितीनुसार बीसीसीआयने म्हटले आहे की, “शुबमनला खूप ताप आहे.” त्याचवेळी बीसीसीआयच्या सूत्रांनी सांगितले होते की, “शुबमन डेंग्यू या आजाराने ग्रस्त आहे. डेंग्यूमधून बरे होण्यासाठी आणि पुन्हा मॅच-फिट होण्यासाठी खेळाडूला साधारणत: ७-१० दिवस लागतात. मात्र, प्लेटलेटच्या संख्येत लक्षणीय घट झाल्यास, रुग्णाला बरे होण्यास जास्त वेळ लागू शकतो.”

अफगाणिस्ताननंतर भारताला पाकिस्तानविरुद्ध सामना खेळायचा आहे

काही मीडिया रिपोर्ट्समध्ये असे म्हटले आहे की अफगाणिस्तानविरुद्धच्या सामन्याव्यतिरिक्त, शुबमन १४ ऑक्टोबर रोजी अहमदाबादमध्ये होणाऱ्या पाकिस्तानविरुद्धच्या भारताच्या तिसऱ्या सामन्यातूनही बाहेर राहू शकतो. शुबमनने यावर्षी १२०० धावा केल्या आहेत आणि अलीकडेच कर्णधार रोहित शर्मासह एक यशस्वी सलामीची जोडी तयार केली आहे. तो दीर्घकाळ अनुपस्थित राहिल्यास भारतीय संघासाठी मोठा धक्का बसू शकतो.

हेही वाचा: IND vs AUS: विराट कोहलीच्या झेल सोडल्यावर अश्विनने केला खुलासा; म्हणाला, “मी एकाच जागेवर बसून…”

इशान किशन पुन्हा ओपन करू शकतो

टीम मॅनेजमेंटला शुबमन गिलबाबत कोणताही धोका पत्करायचा नाही. अफगाणिस्तानविरुद्धच्या पुढील सामन्यात डावखुरा यष्टिरक्षक फलंदाज इशान किशन त्याच्या जागी रोहित शर्मासोबत पुन्हा एकदा सलामी करताना दिसणार आहे. ऑस्ट्रेलियाविरुद्धच्या सामन्यात इशान किशननेही सलामी दिली होती, मात्र त्याला खातेही उघडता आले नाही. त्याने आतापर्यंत २६ सामने खेळले आहेत. या काळात त्याची सरासरी ४४च्या आसपास आहे. इशानच्या नावावर ८८६ धावा आहेत. त्याने एक शतक आणि सात अर्धशतके केली आहेत. किशनने यावर्षी तीन अर्धशतके झळकावली आहेत.

हेही वाचा: IND vs AUS: माजी फिरकीपटू अनिल कुंबळेने के.एल. राहुलबाबत केले सूचक विधान; म्हणाला, “आता तू खऱ्या…”

अफगाणिस्तानविरुद्ध भारताची संभाव्य प्लेइंग-११

रोहित शर्मा (कर्णधार), इशान किशन, विराट कोहली, श्रेयस अय्यर/सूर्यकुमार यादव, के.एल. राहुल, हार्दिक पांड्या, रवींद्र जडेजा, रविचंद्रन अश्विन/शार्दुल ठाकूर, कुलदीप यादव, जसप्रीत बुमराह आणि मोहम्मद सिराज.