IND vs BAN, Asia Cup 2025: टीम इंडियाचा अंतिम फेरीत प्रवेश! बांगलादेशवर मिळवला एकतर्फी विजय

जसप्रीत बुमराहने तांझिड हसनला बाद करत बांगलादेशला पहिला दणका दिला. चेंडू फ्लिक करायचा तांझिडचा प्रयत्न हवेत उंच गेला. शिवम दुबेने चांगला झेल टिपला.

बांगलादेशने सुरुवातीच्या दोन षटकात शिस्तबद्ध मारा करत शुबमन गिल आणि अभिषेक शर्मा जोडीला मोठे फटके खेळण्यापासून रोखलं.

भारतीय संघाने अंतिम अकरात कोणताही बदल केलेला नाही मात्र बांगलादेशने संघात घाऊक बदल केले आहेत. नियमित कर्णधार लिट्टन दास दुखापतीमुळे या सामन्यात खेळू शकणार नाही.

भारतीय संघ

शुबमन गिल, अभिषेक शर्मा, सूर्यकुमार यादव (कर्णधार), तिलक वर्मा, संजू सॅमसन, हार्दिक पंड्या, शिवम दुबे, अक्षर पटेल, कुलदीप यादव, वरुण चक्रवर्ती, जसप्रीत बुमराह.

बांगलादेश संघ

सैफ हसन, तांझिड हसन, परवेझ होसेन इमॉन, तौहिद हृदोय, जेकर अली (कर्णधार आणि यष्टीरक्षक), शामिम होसेन, रिशाद होसेन, नसुम अहमद, तांझिम हसन साकीब, मोहम्मद सैफूद्दीन, मुस्ताफिझूर रहमान.

भारतीय संघाने आज बांगलादेशला नमवलं तर श्रीलंकेचं स्पर्धेतलं आव्हान संपुष्टात येईल. सुपर फोर गटात श्रीलंकेला बांगलादेश आणि पाकिस्तानविरुद्ध पराभवाला सामोरं जावं लागलं आहे. त्यामुळे त्यांच्यासाठी अंतिम फेरी गाठणं अवघड झालं आहे. भारतीय संघाचा विजय त्यांना गाशा गुंडाळायला लावू शकतो.

'टी२० प्रकारात त्या विशिष्ट दिवशी जो संघ सर्वोत्तम खेळतो तो जिंकतो त्यामुळे सुपर फोर फेरीत दाखल झालेला कोणताही संघ भारताला हरवू शकतो. भारतीय संघ निश्चितच ताकदवान आहे. त्यांना हरवण्यासाठी आम्हाला बॅटिंग, बॉलिंग आणि फिल्डिंग अशा तिन्ही आघाड्यांवर दमदार कामगिरी करावी लागेल. इतिहास त्यांच्या बाजूने आहे पण आम्ही आधी केलेल्या चुका टाळण्याचा प्रयत्न करू', असं बांगलादेशचे मुख्य प्रशिक्षक आणि वेस्ट इंडिजचे माजी अष्टपैलू खेळाडू फिल सिमन्स यांनी सांगितलं.

बांगलादेशविरुद्धच्या लढतीत भारतीय संघ संघात बदल करून काही प्रयोग करणार का हे पाहणे रंजक ठरणार आहे. प्राथमिक फेरीच्या लढतीत ओमानविरुद्ध भारताने जसप्रीत बुमराह आणि वरुण चक्रवर्ती यांच्याऐवजी अर्शदीप सिंग आणि हर्षित राणा यांनी अंतिम अकरात संधी दिली होती. अंतिम फेरी गाठण्यासाठी जास्तीत जास्त सामने जिंकणं आवश्यक आहे. मात्र त्याचवेळी वर्कलोड मॅनेजमेंट सांभाळणंही गरजेचं आहे. भारताने पारंपरिक प्रतिस्पर्धी पाकिस्तानविरुद्धचा सुपर फोर फेरीचा सामना जिंकला आहे. आज बांगलादेश आणि त्यानंतर श्रीलंकेविरुद्धच्या लढती बाकी आहेत.

बांगलादेशने आतापर्यंत एकदाही आशिया चषक स्पर्धेचं जेतेपद पटकावलेलं नाही. १६ वेळा स्पर्धेत सहभागी होऊनही बांगलादेशला जेतेपदाने हुलकावणी दिली आहे. यंदाही प्राथमिक फेरीत त्याला दमदार खेळ करता आला नाही. मात्र सुपर फोरच्या पहिल्याच लढतीत बांगलादेशने श्रीलंकेला पराभवाचा दणका दिला. आज त्यांच्यासमोर बलाढ्य भारतीय संघाचं आव्हान आहे.