LSG vs MI: आकाश मधवालने रचला इतिहास, माजी खेळाडू अनिल कुंबळेच्या ‘या’ विक्रमाशी केली बरोबरी

मैदानाबाहेरही अनिल कुंबळेशी साम्य –

आकाश मधवाल मूळचा रुरकी, उत्तराखंडचा असून तो स्टार यष्टीरक्षक ऋषभ पंतचा शेजारी आहे. आकाश आणि कुंबळे यांच्यात एक समानता आहे की, दोघेही इंजिनिअर आहेत. २०१८ च्या आधी आकाश टेनिस बॉलने क्रिकेट खेळायचा. वयाच्या २४ व्या वर्षापर्यंत त्याने कसोटी क्रिकेटच्या चेंडूला स्पर्शही केला नव्हता. मात्र ५ वर्षांनंतरची कथा पूर्णपणे वेगळी आहे. आता तो मुंबई इंडियन्समध्ये जसप्रीत बुमराहसारख्या खेळाडूंमुळे निर्माण झालेली पोकळी भरून काढताना दिसत आहे.

सनरायझर्स हैदराबादविरुद्ध ४ विकेट्स घेतल्या होत्या –

अनकॅप्ड खेळाडू म्हणून आकाश मधवालही सामन्यातील सर्वोत्तम गोलंदाज ठरला. त्याने अंकित राजपूतला मागे सोडले आहे. २०१८ मध्ये, अंकितने पंजाब किंग्ज (तत्कालीन किंग्ज इलेव्हन पंजाब) विरुद्ध १४ धावांत ५ बळी घेतले होते. आकाशने या सामन्यापूर्वी सनरायझर्स हैदराबादविरुद्ध ३७ धावांत ४ बळी घेतले होते. गुजरात टायटन्सविरुद्ध ३१ धावांत ३ बळी घेतले होते.

हेही वाचा – CSK vs GT: सीएसकेने गुजरातविरुद्ध नोंदवला सर्वात मोठा विक्रम, कोणत्याच संघाला न जमलेला केला ‘हा’ पराक्रम

आकाश मधवालची आयपीएलमधील कामगिरी –

गेल्या वर्षी सूर्यकुमार यादव जखमी असताना आकाशला मुंबई इंडियन्सने संघात घेतले होते. आयपीएलमध्ये खेळणारा तो उत्तराखंड क्रिकेट संघाचा पहिला खेळाडू आहे. त्याने ७ सामन्यात २१.३ षटकात १६७ धावा देत १३ बळी घेतले आहेत. त्याने एका सामन्यात एकदा ४ तर एकदा ५ विकेट्स घेतल्या आहेत. लखनौविरुद्धच्या सामन्यात त्याने २१ चेंडू टाकले आणि ५ धावांत ५ बळी घेतले. त्याचबरोबर १७ चेंडूंत एकही धाव दिली नाही.

हेही वाचा – GT vs CSK: धोनी वेळ वाया घालवत होता आणि पंच हसत होते, का नाही केली कारवाई? ऑस्ट्रेलियाच्या माजी खेळाडूचा सवाल

सामनावीर म्हणून निवड झाल्यानंतर आकाश मधवाल काय म्हणाला?

सामनावीर ठरल्यानंतर आकाश मधवाल म्हणाला, “मी खूप सराव करत आहे आणि संधीची वाट पाहत आहे. मी इंजिनीअरिंग केले आहे, क्रिकेट ही माझी आवड आहे आणि २०१८ पासून मी या क्षणाची वाट पाहत आहे. जेव्हा आम्ही नेटमध्ये सराव करतो, तेव्हा व्यवस्थापन आम्हाला लक्ष्य देते आणि आम्ही आमचे सर्वोत्तम देण्याचा प्रयत्न करतो. येत्या सामन्यांमध्ये चांगली कामगिरी करण्याची आशा असून चॅम्पियन व्हायचे आहे. निकोलस पूरनची विकेट माझ्यासाठी सर्वात आनंददायक होती.”