सावंतवाडीत हृदयद्रावक घटना: मुलाचा मृत्यू ऐकून वडिलांचाही दुर्दैवी अंत, संभया कुटुंबावर दुःखाचा डोंगर

क्रिशचा बुडून दुर्दैवी मृत्यू;

मिळालेल्या माहितीनुसार, क्रिश संभया (१८, रा. सालईवाडा, सावंतवाडी) हा तरुण मंगळवारी, ३ जून रोजी सायंकाळी ५.३० वाजण्याच्या सुमारास कारीवडे येथील धरणावर फोटो काढायला गेला होता. यावेळी त्याचा पाय घसरला आणि तो नदीत पडला. पाण्यात बुडून त्याचा दुर्दैवी मृत्यू झाला. सेल्फी काढण्याच्या प्रयत्नात ही दुर्घटना घडल्याचे बोलले जात आहे.

या घटनेनंतर बाबल आल्मेडा रेस्क्यू टीमच्या सहाय्याने क्रिशचा शोध घेण्याचा प्रयत्न करण्यात आला, मात्र अखेर मंगळवारी रात्री उशिरा त्याचा मृतदेह तरंगताना आढळून आला.

मुलाच्या धक्क्याने वडिलांना हृदयविकाराचा झटका:

क्रिशच्या निधनाची बातमी त्याचे वडील सेव्हिओ संभया (४८) यांना समजताच त्यांना प्रचंड मानसिक धक्का बसला. क्रिश हा त्यांचा अत्यंत लाडका मुलगा असल्याने त्याच्या अचानक जाण्याने त्यांना असह्य दुःख झाले. याच धक्क्याने आज बुधवारी सकाळी त्यांना हृदयविकाराचा तीव्र झटका आला.

सामाजिक कार्यकर्ते प्रथमेश प्रभू यांनी त्यांना सकाळी सहा वाजता तातडीने सावंतवाडी उपजिल्हा रुग्णालयात दाखल केले. याप्रसंगी सामाजिक बांधिलकी प्रतिष्ठानचे रवी जाधव आणि लक्ष्मण कदम यांनी त्वरित आरोग्य यंत्रणा सक्रिय केली. ऑन-कॉल ड्युटी बजावत असलेले डॉ. अभिजित चितारी काही मिनिटांतच रुग्णालयात दाखल झाले आणि सेव्हिओ संभया यांच्यावर सर्व प्राथमिक उपचार करण्यात आले. परंतु, उपचारादरम्यानच आज दुपारी १२ वाजता त्यांचे रुग्णालयात निधन झाले.

मुलगा आणि वडिलांच्या निधनाच्या या हृदयद्रावक घटनेमुळे संभया परिवार, त्यांचे मित्रमंडळीत शोककळा पसरली आहे. एका क्षणात हसत्या-खेळत्या कुटुंबावर काळाने घाला घातल्याने सर्वत्र हळहळ व्यक्त होत आहे.