Maharashtra Breaking News Updates : “मराठी भाषेला कमी लेखणे…”, प्राथमिक शाळेपासून तिसऱ्या भाषेच्या सक्तीबाबत शिक्षणमंत्री भुसेंचं वक्तव्य

शिक्षणमंत्री दादा भुसे सध्या विदर्भाच्या दौऱ्यावर आहे. आज विदर्भातील शाळांचा पहिला दिवस आहे. पहिल्या दिवशी विद्यार्थ्यांचं शाळेत स्वागत करण्यासाठी दादा भुसे यांनी काही शाळांमध्ये हजेरी लावली. यावेळी ते म्हणाले, पहिली ते पाचवीच्या मुलांना तिसरी भाषा शिकवण्यासंदर्भात जो शासन निर्णय घेतला आहे त्यामध्ये तिसऱ्या भाषेसंदर्भात कुठेही अनिर्वाय शब्द नाहीये. विद्यार्थी व त्यांच्या पालकांना अपेक्षित असेल ती भाषा शिकवली जाईल. सगळं विद्यार्थी व पालकांवर सोपवलं आहे. पहिली दुसरीतील विद्यार्थ्यांना बडबड गीतांतून भाषा शिकवली जाते, ती खूप क्लिष्ट पद्धतीने शिकवली जात नाही. केंद्र शासनाच्या वतीने नॅशनल एजुकेशन पॉलिसी आणण्यात आली आहे. त्यानुसार आवश्यक ते शिक्षण मुलांना दिलं जाणार आहे. मुख्यमंत्री, उपमुख्यमंत्री आदेश देतील त्यानुसार निर्णय घेतला जाईल, मराठी भाषेला कमी लेखणे हा आमचा उद्देश नाही. येणाऱ्या काळामध्ये शाळेमधील भौतिक सुधारणांचा विचार करत शुद्ध पिण्याचे पाणी, स्वच्छ स्वच्छतागृह सोयी दिल्या जाणार.

लोकसभा अध्यक्ष ओम बिर्ला यांच्या हस्ते आणि मुख्यमंत्री देवेंद्र फडणवीस यांच्या प्रमुख उपस्थितीत 'संसद तसेच राज्य आणि केंद्रशासित प्रदेश विधिमंडळांच्या अंदाज समित्यांच्या राष्ट्रीय परिषदेचे उदघाटन संपन्न झाले. यावेळी लोकसभा अध्यक्ष ओम बिर्ला आणि मुख्यमंत्री देवेंद्र फडणवीस यांनी संसदीय अंदाज समितीच्या ७५ व्या वर्धापन दिनानिमित्त 'कमिटी ऑन एस्टिमेट्स, पार्लमेंट ऑफ इंडिया (1950-2025)' या स्मरणिकेचे प्रकाशन केले.

राज्यात महायुतीचं सरकार आल्यावर शेतकऱ्यांना कर्जमाफी दिली जाईल असं महायुतीच्या नेत्यांनी आश्वासन दिलं होतं. मात्र, अवकाळी व त्यानंतर मुसळधार पावसाने शेतकऱ्यांचं प्रचंड नुकसान झालेलं असताना शेतकऱ्यांनी कर्जमाफीची मागणी केली आहे. मात्र महायुतीच्या नेत्यांनी विधानसभा निवडणुकीवेळी दिलेला शब्द आता फिरवलाय अशी टीका होत आहे. यासंदर्भात मुख्यमंत्री देवेंद्र फडणवीस यांना प्रश्न विचारल्यावर ते म्हणाले, मी कर्जमाफीबाबत सविस्तर सांगितलं आहे, कर्जमाफी कधी करायची याचे काही नियम आहेत. त्याची एक पद्धत आहे, या सरकारनं दिलेला एकही शब्द फिरवत नाही, योग्य वेळी कर्जमाफी निर्णय घेतला जाईल. त्यावर माजी गृहमंत्री व राष्ट्रवादी काँग्रेस पार्टी शरदचंद्र पवार या पक्षाचे आमदार अनिल देशमुख म्हणाले, सत्तेची पाच वर्षे संपत आल्यावर शेतकऱ्यांची कर्जमाफी करणार का?

संजय राऊत म्हणाले, "भास्कर जाधव हे आमचे सहकारी व शिवसेनेचे (ठाकरे) प्रमुख नेते आहेत. त्यांच्याकडे दांडगा अनुभव आहे. ते चाणाक्ष नेते आहेत. शिवसेनेच्या गेल्या काही काळात त्यांनी पक्षाच्या वाढीसाठी नक्कीच खूप योगदान दिलं आहे. ते आम्हा सर्वांना प्रिय आहेत. त्यांची प्रतिक्रिया मी वृत्तपत्रांमध्ये वाचली आहे. त्यांनी आजवर पक्षाच्या अनेक जबाबदाऱ्या योग्यरित्या पेलवल्या आहेत. ते बराच काळ त्यांच्या मतदारसंघात व कोकणात असतात. ते जेव्हा मुंबईत येतील तेव्हा आमचे पक्षप्रमुख उद्धव ठाकरे त्यांच्याशी बोलतील. भास्कर जाधव हे कडवट शिवसैनिक आहेत. त्यांच्या मनात काय आहे ते आम्ही समजून घेऊ. त्यांच्या मनातील वेदना उद्धव ठाकरे समजून घेतील".