MNS MVA Satyacha Morcha : लोकशाही टिकवायची असेल तर मतभेद विसरुन एकत्र या-शरद पवार

अॅनाकोंडाला आपल्याला आता कोंडावंच लागेल. नाहीतर हे लोक सुधारणार नाहीत. रोज कुठून तरी पुरावे येत आहेत. तरीही राज्यकर्ते आणि निवडणूक आयोग गप्प बसले. आपला पक्ष चोरला, नाव चोरलं, निशाणी चोरली माझे वडील चोरी करायचा प्रयत्न झाला आणि ते पण पुरलं नाही म्हणून आता मतचोरी करत आहेत. मुख्यमंत्री म्हणाले की विरोधी पक्षांनी म्हणजे आपण कसा लाभ घेतला याचा पर्दाफाश करेन. मी देवेंद्र फडणवीस यांना आव्हान देतो आहे की तुम्ही आमचा पर्दाफाश कराच. मुख्यमंत्री जेव्हा असं बोलत आहेत त्याचा अर्थ त्यांनी मतचोरी मान्य केली आहे. असं उद्धव ठाकरे यांनी म्हटलं आहे.

आजचा मोर्चा राग दाखवण्याचा, ताकद दाखवण्याचा, दिल्लीपर्यंत आवाज पोहचवण्याचा मोर्चा आहे. आत्तापर्यंत या विषयावर सगळे जण बोलले आहेत. मी पण माझी भूमिका मांडली आहे. या विषयावर आता नव्याने बोलण्यासारखं काही नाही. तुम्ही सगळेजण अत्यंत ताकदीने मोर्चासाठी जमलात त्याबद्दल मी तुमचे आभार मानतो असं राज ठाकरे यांनी म्हटलं आहे. दुबार मतदार आहेत हे आम्ही सांगतो आहे, उद्धव ठाकरे, शरद पवार, जयंत पाटील हे सगळे सांगत आहेत. भाजपाचे लोक सांगत आहेत, अजित पवारांचे लोक सांगत आहेत एकनाथ शिंदेंचे लोक सांगत आहेत की दुबार मतदार आहेत. मग निवडणूक घेण्याची घाई का? असा प्रश्न राज ठाकरेंनी उपस्थित केला आहे.

विरोधक त्यांच्या पराभवाची पार्श्वभूमी तयार करत आहेत. स्थानिक स्वराज्य संस्थांच्या निवडणुकांमध्ये जनता यांची माती करणार आहे हे यांना कळलं आहे. त्यामुळे महाभकास आघाडीचा मोर्चा निघतो आहे. जनतेचा विश्वास हा देवेंद्र फडणवीस यांच्यावर आहे असं भाजपा नेत्या चित्रा वाघ यांनी म्हटलं आहे.

महाविकास आघाडी आणि मनसेचा सत्याचा मोर्चा काही वेळातच मुंबईत सुरु होणार आहे. मनसे अध्यक्ष राज ठाकरे चर्चगेट या ठिकाणी पोहचले आहेत. दुपारी ४ च्या दरम्यान नेत्यांची भाषणं होतील. या मोर्चाचे सगळे अपडेट्स पाहा या व्हिडीओत.

महाविकास आघाडीचे ३१ खासदार निवडून आले, तेव्हा मतचोरी झाली होती का? लोकसभा निवडणुकीच्या वेळी मतदार याद्यांमध्ये घोळ नव्हता का? दुबार आणि तिबार नावं मतदार याद्यांमध्ये नसावीत ही आमचीही भूमिका आहे असं चंद्रशेखर बावनकुळेंनी म्हटलं आहे. निवडणुकीच्या काळात असा मोर्चा काढून लोकांमध्ये संभ्रम निर्माण करत आहेत. महाविकास आघाडीचा हा केविलवाणा प्रयत्न आहे. अशा मोर्चाला राज ठाकरे जात आहेत याचं मला आश्चर्य वाटतं असंही बावनकुळे यांनी म्हटलं आहे. लोकसभेला तेच मशीन होतं, त्याच मतदार याद्या होत्या. तुम्ही जिंकले की मतदार याद्या चांगल्या. हरले की मतदार याद्यांचा घोळ, बोगस मतदार याद्या हे बोलत रहायचं. महाविकास आघाडीत प्रचंड धुसफूस आहे. काँग्रेसच्या चार नेत्यांची चार तोंडं वेगळ्या ठिकाणी आहेत. या मोर्चात काही दम नाही हे काँग्रेसलाही माहीत आहे असंही चंद्रशेखर बावनकुळे यांनी म्हटलं आहे.

मुंबईत होणाऱ्या सत्याच्या मोर्चासाठी नाशिकहून शेकडोंच्या संख्येने मनसेचे पदाधिकारी रवाना झाले आहे. आज मुंबईत विरोधकांचा मत चोरी आणि मतदार यादीतील घोळ संदर्भात मोठा मोर्चा निघणार आहे यात नाशिकहून शेकडो मनसैनिक रवाना झालेय यावेळी त्यांनी नाशिकमध्ये शक्ती प्रदर्शन केले जनतेला फसवून हे सरकार आलेले आहे मतदाराची दिशाभूल केलीय ९६ लाख मतदार वाढवले असून ते बोगस मतदार मतदान यादीतून वगळावे यासाठी हा सत्याचा मोर्चा आहे आणि यात सगळे नागरिक सहभागी होणार असल्याचे मनसेच्या पदाधिकाऱ्यांनी सांगितले.

विरोधकांच्या मागण्या काय आहेत?

१) महापालिका निवडणुकांच्या आधी मतदार याद्या अद्ययावत करा, त्यात कुठलीही चूक नको

२) मतदार याद्या अद्ययावत होईपर्यंत निवडणुका घेऊ नका, त्यासाठी सहा महिन्यांचा कालावधी लागला तरीही चालेल.

३) मतदार याद्यांमधली दुबार नावं काढा

४) ७ नोव्हेंबरपर्यंत मतदार नोंदणी करा

या चार प्रमुख मागण्या राज ठाकरेंच्या मनसेने आणि महाविकास आघाडीने केल्या आहेत. सत्याचा मोर्चा याच मागण्यांसाठी काढला जाणार आहे. राहुल गांधी यांनी केंद्रीय निवडणूक आयोगाने मतदार याद्यांमध्ये घोळ घातल्याचा आरोप केला होता. निवडणूक आयोग आणि भाजपा यांचं साटंलोटं असल्याचंही म्हटलं होतं. आता राज्यातही महाविकास आघाडी आणि मनसेने मतदार याद्यांचे घोळ आहेत असा आरोप केला आहे. मोर्चात आणखी काय होतं ते पाहणं महत्त्वाचं ठरणार आहे.