क्वारंटाइन वेळेत सर्वच कलाकार सोशल मीडियाद्वारे चाहत्यांच्या संपर्कात आहेत. काहीजण मदत करत आहेत तर काहीजण व्हिडीओद्वारे लोकांमध्ये जनजागृती करण्याचं काम करत आहेत. करोना व्हायरसशी लढण्यासाठी अक्षय कुमारने तब्बल २५ कोटी रुपयांची मदत केली. त्यापाठोपाठ बऱ्याच कलाकारांनी पुढाकार घेत आर्थिक मदत केली. अक्षयची सोशल मीडियावर बरीच वाहवा झाली. मात्र तरीसुद्धा लोकप्रियतेच्या बाबतीत त्याला एका अभिनेत्याने मागे टाकलंय. हा अभिनेता आहे 'भाईजान' सलमान खान. एका लोकप्रिय पोर्टलने केलेल्या सर्वेक्षणानुसार, सलमान खान स्टार रँकिंगमध्ये पहिल्या स्थानावर आहे. लोकप्रियतेच्या निकषांवर या यादी बनवण्यात आली आहे. या यादीत अक्षय कुमार दुसऱ्या स्थानावर आहे. मात्र तरी सलमानच्या तुलनेत गुणांनी खूपच मागे आहे. अक्षय कुमारला ८८७ गुण असून सलमान १७१८ गुणांवर आहे. लहानांपासून मोठ्यांपर्यंत सलमानचे चाहते जगभरात आहेत. तरुणांमध्येही त्याची क्रेझ पाहायला मिळते. त्यामुळे ब्रँड सर्किटमध्येही त्याचं नाव प्रसिद्ध आहे. नुकत्याच एका आघाडीच्या कोल्ड्रिंक्सच्या ब्रँडसाठी त्याला अॅम्बेसेडर म्हणून करारबद्ध करण्यात आले आहे.
