दिग्गज चित्रपट निर्माते यश चोप्रा यांनी अनेक उत्तम चित्रपटांचे दिग्दर्शन केले आहे. त्यांचा एक सुपरहिट चित्रपट ‘डर’ होता, जो १९९३ मध्ये आला आणि त्याने शाहरुख खानचे नाव आणखी मोठे केले. या चित्रपटात सनी देओल देखील दुसऱ्या मुख्य भूमिकेत होता, ज्याने शाहरुखला जोरदार टक्कर दिली. पण, तुम्हाला माहिती आहे का की आमिर खान या चित्रपटात पहिली पसंती होता?
बॉलीवूड अभिनेता आमिर खान सध्या त्याच्या आगामी ‘सितारे जमीन पर’ या चित्रपटामुळे चर्चेत आहे. चाहते आमिरच्या या चित्रपटाच्या प्रदर्शनाची आतुरतेने वाट पाहत आहेत. हा चित्रपट लवकरच प्रदर्शित होणार आहे.
आमिर त्याच्या ‘सितारे जमीन पर’ या चित्रपटाच्या प्रमोशनमध्ये व्यग्र आहे. दरम्यान, आमिरने ‘डर’ चित्रपटातून बाहेर पडल्याबद्दल खुलासा केला. बऱ्याच दिवसांपासून अशी चर्चा होती की आमिरने हा चित्रपट नाकारला होता, पण आता अभिनेत्याने संपूर्ण सत्य सांगितले आहे. जाणून घेऊया आमिर काय म्हणाला?
आमिरने ‘डर’ चित्रपट करण्यासाठी ‘ही’ अट ठेवलेली
झूम फॅन क्लबशी बोलताना आमिर म्हणाला, ‘मी ‘डर’ चित्रपटाला नाही म्हटले नव्हते, मला काढून टाकण्यात आले.’ त्याने सांगितले की दोन नायकांचा चित्रपट असल्याने त्याला सनी देओलबरोबर चित्रपटाची कथा ऐकायची होती. ‘माझा एक नियम आहे की, जेव्हा दोन कलाकार असतात तेव्हा दिग्दर्शकाला एकत्रितपणे चित्रपटाची कथा ऐकवावी लागते. यशजींना एकत्रितपणे चित्रपटाची कथा ऐकवायची नव्हती, त्यामुळे त्यांनी मला काढून टाकले.’
प्रत्येक व्यक्तीची मानसिकता वेगळी असते : आमिर खान
आमिर पुढे म्हणाला, ‘मल्टी-स्टारर चित्रपटांमध्ये एकत्र काम करताना ही त्यांची मानक पद्धत आहे. टीमवर्क सुधारण्यासाठी त्याला सहकलाकारांबरोबर स्क्रिप्ट ऐकायला आवडते. प्रत्येक व्यक्तीची मानसिकता वेगळी असते… आम्ही एक संघ म्हणून काम करतो.’
आमिर खानने सलमान खानबरोबरच्या ‘अंदाज अपना अपना’ दरम्यान घडलेल्या अशाच परिस्थितीची आठवण करून दिली. तो म्हणाला, ‘सलमानने तीन वेळा चित्रपटाची कथा ऐकण्यास नकार दिला. त्याचा सेक्रेटरी तिथे होता, त्याने सांगितले की सलमान ऐकेल, तुम्ही लोक ऐका. मी म्हटले की सलमान ऐकेल तेव्हा मी ऐकेन.’ आमिरची प्रक्रिया यश चोप्राच्या ‘डर’ चित्रपटात चालली नाही, म्हणून त्याला काढून टाकण्यात आले. नंतर अखेर हा चित्रपट शाहरुख खान, सनी देओल आणि जुही चावला यांच्याबरोबर बनवण्यात आला आणि तो प्रचंड यशस्वी झाला, अगदी राष्ट्रीय पुरस्कारही जिंकला.
आमिर त्याच्या आगामी ‘सितारे जमीन पर’ चित्रपटाच्या प्रदर्शनाची तयारी करत आहे, ज्यामध्ये जिनिलीया देशमुख देखील मुख्य भूमिकेत आहे. आर. एस. प्रसन्ना दिग्दर्शित हा चित्रपट २० जून रोजी थिएटरमध्ये प्रदर्शित होणार आहे.
