अजय देवगणने सिनेसृष्टीत पूर्ण केली ३० वर्षे, अमिताभ बच्चन म्हणतात, “पुढील ७० वर्षे तू…”

अक्षय कुमारने इन्स्टाग्रामवर अजय देवगणसोबतचा सूर्यवंशी चित्रपटातील एक फोटो शेअर केला आहे. हा फोटो शेअर करताना तो म्हणाला की, “मला अजूनही आठवतंय, की जेव्हा आपण नवीन होतो. तेव्हा तू आणि मी एकत्र जुहू बीचवर मार्शल आर्टचा सराव करायचो आणि त्यावेळी तुझे वडील आपल्याला याचे प्रशिक्षण द्यायचे. ते कसले दिवस होते यार…,अशाचप्रकारे ‘फूल और कांटे’ हा चित्रपट प्रदर्शित होऊन ३० वर्ष झाली आहेत. वेळ किती वेगाने जातो. आपली मैत्री मात्र अशीच अखंडित राहू दे,” असे अक्षय म्हणाला.

दरम्यान बॉलिवूड अभिनेते अमिताभ बच्चन यांनीही अजय देवगणला शुभेच्छा दिल्या आहेत. अमिताभ बच्चन यांनी याबाबतचे ट्वीट केले आहे. बिग बी म्हणाले की, “अजय देवगणने चित्रपट सृष्टीत ३० वर्षे पूर्ण केली आहेत. त्याचा पहिला चित्रपट ‘फूल और कांटे’ २२ नोव्हेंबरला प्रदर्शित झाला होता. गोड बोलणारा, फारसा त्रास न देणारा आणि तरीही प्रत्येक गोष्टींची उत्सुकता असलेल्या अजयला माझ्याकडून खूप खूप शुभेच्छा. पुढील ७० वर्षे तू असाचप्रकारे काम करत राहो, हीच ईश्वर चरणी प्रार्थना,” असे त्यांनी म्हटले आहे.

दरम्यान काही दिवसांपूर्वी अजय देवगणचा ‘भुज: द प्राइड ऑफ इंडिया’ हा चित्रपट प्रदर्शित झाला. अजय देवगण लवकरच ‘मैदान’, ‘थँक गॉड’, ‘RRR’ आणि ‘गंगूबाई काठियावाड़ी’ यासारख्या काही चित्रपटात झळकणार आहे.