आमिर- शाहरुख यांनी हिंदू पद्धतीने पूजा केल्यावर भाजपा मंत्र्याची प्रतिक्रिया; म्हणाले “त्यांनी कुणाच्याही भावना…”

शाहरुख खानच्या ‘पठाण’ चित्रपटावरून जोरदार वाद होताना दिसत आहेत. या चित्रपटाचं ‘बेशरम रंग’ प्रदर्शित झाल्यानंतर यात दीपिकाने घातलेल्या भगव्या रंगाच्या बिकिनीवरून सोशल मीडियावर उलट सुलट चर्चा होताना दिसत आहे. भाजपा मंत्री नरोत्तम मिश्रा यांनी नुकत्याच घेतलेल्या एका पत्रकार परिषदेत यावर प्रतिक्रिया दिली होती. त्याचबरोबर जेव्हा त्यांना शाहरुखने वैष्णोदेवीचं दर्शन घेतलं याबाबत प्रश्न विचारण्यात आला होता.

आणखी वाचा-“मी यापेक्षा जास्त…” ‘पठाण’ चित्रपटाला विरोध करणाऱ्या भाजपा मंत्र्यांवर आदिश वैद्य संतापला

एका पत्रकाराने नरोत्तम मिश्रा यांना “शाहरुखने वैष्णोदेवीचं दर्शन घेतलं तर आमिर खानही काही दिवसांपूर्वीच कलशपूजा करताना दिसला होता. हा कोणत्या प्रकारचा बदल आहे.” असा प्रश्न विचारला होता. यावर उत्तर देताना ते म्हणाले, “आता समाज जागरुक झाला आहे. जर या सर्वांना ही गोष्ट समजली असेल तर उत्तमच आहे. सर्वांना आपापल्या आस्थेप्रमाणे पूजा करण्याचा हक्क आहे. पण कोणाच्या भावना दुखावल्या जाऊ नयेत एवढंच.”

दरम्यान नरोत्तम मिश्रा यांनी ‘पठाण’च्या ‘बेशरम रंग’ या गाण्यावर संतप्त प्रतिक्रिया दिली होती. या चित्रपटात दीपिकाची वेशभूषा ठीक करावी अशी मागणी त्यांनी केली होती. त्यांची ही मागणी पूर्ण न झाल्यास ‘पठाण’ चित्रपट मध्यप्रदेशमध्ये प्रदर्शित होऊ देणार नाही असंही त्यांनी म्हटलं होतं.