Vicky Kaushal Katrina Kaif Welcome Baby Boy: अभिनेत्री कतरिना कैफ व अभिनेता विकी कौशल आई-बाबा झाले आहेत. कतरिना कैफने तिच्या पहिल्या बाळाला जन्म दिला आहे. दोघांनी इन्स्टाग्रामवर पोस्ट करून ही आनंदाची बातमी चाहत्यांबरोबर शेअर केली आहे. कतरिना कैफला मुलगा झाला आहे.
कतरिना कैफ व विकी कौशल यांनी काही दिवसांपूर्वी त्यांच्या घरी चिमुकल्या सदस्याचं आगमन होणार आहे, ही गोड बातमी शेअर केली होती. त्यानंतर आता विकीने इन्स्टाग्रामवर पोस्ट शेअर करून मुलाच्या जन्माची माहिती दिली. कतरिनाने आज, ७ नोव्हेंबर रोजी मुलाला जन्म दिला.
कतरिना कैफ ४२ व्या वर्षी आई झाली आहे. कतरिना व विकी यांनी लग्नाच्या चार वर्षांनी आपल्या पहिल्या बाळाचं स्वागत केलं. ‘Blessed’ असं कॅप्शन देत विकीने पोस्ट केली. “आम्ही खूप प्रेमाने आणि कृतज्ञतेने आमच्या मुलाचं स्वागत करतोय,” असं विकीने लिहिलं आहे.
पाहा पोस्ट
विकी कौशलच्या या पोस्टवर चाहत्यांनी लाइक्स व कमेंट्सचा वर्षाव केला आहे. माधुरी दीक्षितने विकी व कतरिनाचं अभिनंदन केलं आहे. ‘दोघांचंही अभिनंदन. तुमच्या चिमुकल्याला खूप प्रेम’, अशी कमेंट माधुरी दीक्षितने केली आहे. तर सोनम कपूर, आयुष्मान खुराना, करीना कपूर, प्रियांका चोप्रा, राजकुमार राव, दिया मिर्झा, परिणीती चोप्रा, मनीष पॉल, मलायका अरोरा यांनीही कमेंट करून विकी व कतरिनाचं अभिनंदन केलं आहे.
विकी-कतरिनाने ४ वर्षांपूर्वी केलंय लग्न
कतरिना कैफ आणि विकी कौशल यांनी ४ वर्षांपूर्वी लग्न केलं होतं. दोघांनी २०२१ मध्ये राजस्थानमध्ये डेस्टिनेशन वेडिंग केले होते. त्यांच्या लग्नाला फक्त कुटुंबीय आणि जवळचे नातेवाईक उपस्थित होते. या जोडप्याने इन्स्टाग्रामवर त्यांच्या लग्नाचे फोटो शेअर करून चाहत्यांना आश्चर्याचा धक्का दिला होता. आता लग्नानंतर चार वर्षांनी हे दोघेही आई-बाबा झाले आहेत. कतरिनाला मुलगा झाला आहे. या जोडप्यावर सर्वजण शुभेच्छांचा वर्षाव करत आहेत.
