‘कॉफी आणि बरंच काही’, ‘व्हॉट्सअप लग्न’, ‘भेटली तू पुन्हा’, ‘मिस्टर अँड मिसेस सदाचारी’ यांसारख्या चित्रपटातून वैभव तत्ववादीने अभिनयाचा ठसा उमटवला. वैभवने मराठीबरोबर हिंदी चित्रपटसृष्टीतही स्वत:ची वेगळी ओळख निर्माण केली. बाजीराव मस्तानी, मणिकर्णिका या बॉलिवूड चित्रपटांमधील वैभवने साकारलेल्या भूमिका प्रेक्षकांच्या पसंतीस उतरल्या. आता वैभव सर्किट या नव्या कोऱ्या मराठी चित्रपटातून प्रेक्षकांच्या भेटीला आला आहे.
मनोरंजन विश्वात काम करताना वैभवचं नाव अनेक मराठी अभिनेत्रींबरोबर जोडलं गेलं होतं. अभिनेत्री पूजा सावंत व वैभव तत्ववादीची ऑन स्क्रीन जोडी प्रेक्षकांना आवडली होती. तसंच प्रार्थना बेहेरेबरोबरच्या त्याच्या जोडीलाही प्रेक्षकांनी पसंती दर्शविली होती. प्रार्थना बेहेरबरोबर वैभव रिलेशनशिपमध्ये असल्याच्या चर्चा रंगल्या होत्या. तर पूजा सावंतबरोबरही त्याचं नाव जोडलं गेलं होतं. ‘लोकमत फिल्मी’ला दिलेल्या मुलाखतीत वैभवने या अफेअरच्या चर्चांवर भाष्य केलं.
“अनेक अभिनेत्रींबरोबर तुझं नाव जोडलं गेलं होतं. पूजा व प्रार्थनाबरोबर अफेअर असल्याच्या चर्चाही रंगल्या होत्या. त्या खऱ्या होत्या की खोट्या?” असा प्रश्न वैभवला विचारण्यात आलं. यावर उत्तर देत वैभव म्हणाला, “आम्ही चांगले मित्र होतो आणि आहोत.”
दरम्यान, वैभव तत्ववादी व ऋता दुर्गुळे मुख्य भूमिकेत असलेला ‘सर्किट’ हा चित्रपट ७ एप्रिलला प्रदर्शित झाला आहे. आकाश पेंढारकर यांनी चित्रपटाचं दिग्दर्शन केलं असून मधूर भांडारकरांची निर्मिती आहे. या चित्रपटात मिलिंद शिंदे व रमेश परदेशी महत्त्वाच्या भूमिकेत आहेत.
