‘बिग बॉस मराठी’मधून घराघरात पोहोचलेले किरण माने नेहमीच चर्चेत असतात. सोशल मीडियावर फोटो आणि व्हिडीओ पोस्ट करत माने चाहत्यांच्या संपर्कात असतात. नुकतचं किरण मानेंनी इन्स्टाग्रामवर एक पोस्ट शेअर केली आहे. या पोस्टच्या माध्यमातून त्यांनी त्यांच्या ३० वर्ष जून्या आठवणींना उजाळा दिला आहे.
हेही वाचा- आई किंवा काकू नाही तर मुग्धाच्या आईला ‘या’ नावाने हाक मारतो प्रथमेश लघाटे, पोस्ट व्हायरल
किरण मानेंनी त्याचे गाव साताऱ्यातील चित्रपटगृहाची आठवण सांगितली आहे. ३० वर्षांपूर्वीचे गजबजलेले चित्रपटगृह आणि आता भग्न, भकास, उदास चित्रपटगृहाची अवस्था आहे. या अवस्थेवर किरण मानेंनी भाष्य केलं आहे.
किरण मानेंची पोस्ट
“वाॅSSSव कस्लं भारीय हे !” सातारा स्टँडजवळ झालेल्या चकचकीत सेव्हन स्टार ‘आयआरके मल्टीप्लेक्स’मध्ये पहिल्यांदा सिनेमा बघायला गेलो होतो तेव्हा माझी पोरगी म्हणाली होती… तिनं असं म्हणताच माझं मन धावत तीस वर्ष मागं गेलं… त्यावेळी मी तिच्या वयाचा होतो… मायणीच्या तंबूत सिनेमा पहात मोठा झालेला मी, त्यावेळची सातार्‍यातली ‘बांधीव थेटरं’ बघून असाच भारावलो होतो !
…सातार्‍यातली ती सगळी सिंगल स्क्रीन थिएटर्स आठवली. पंचवीस तीस वर्ष जिथं दिवसभर माणसांचा गजबजाट, शिट्ट्या टाळ्या हशाचा गजर असायचा… त्या वास्तू आज कुणाचीतरी वाट पहात असल्यासारख्या भग्न, भकास, उदास उभ्या असल्याचं आठवून कसंतरीच झालं.
प्रभात आणि चित्रा टाॅकीज म्हणजे जुने सिनेमे ! आमच्या वडिलांच्या काळातले राज कपूर-दिलीपकुमार-देव आनंद आणि राजेश खन्ना आम्हाला इथंच भेटले.
जयविजय टाॅकीज मराठमोळं. दादा कोंडके-निळूभाऊ-अशोकमामा-लक्ष्या… आजही जयविजयकडं पाहिलं की ‘माहेरची साडी’साठी सकाळी सातपासून बायकांनी लावलेल्या रांगा आणि ‘अशी ही बनवाबनवी’ पहातानाचे हास्यकल्लोळ आठवतात ! आमच्या ‘त्या’ नाजूक वयात चावट इंग्लीश पिच्चरचे ‘माॅर्निंग शो’ज म्हणजे पर्वणीच ! ‘सिरोक्को’ आणि ‘आयरीस’ या दोन सेक्सी पिच्चरनी शोलेपेक्षा जास्त धंदा केला सातार्‍यात…
समर्थ टाॅकीजची अविस्मरणीय आठवण म्हणजे, तिथं माझ्या ‘ऑन ड्यूटी चोवीस तास’ सिनेमाचं पोस्टर लागलंवतं. आयुष्यात पहिल्यांदा पोस्टरवर झळकलोवतो. कलाकारांच्या यादीत ‘…आणि सातारचा सुपुत्र किरण माने’ असं रंगवलं होतं. ते पाहुन भरून आलंवतं ! ज्या पडद्यावर ‘मुकद्दर का सिकंदर’ पासून ‘अग्नीपथ’ पर्यन्त बच्चनच्या एन्ट्रीला थेटर दणाणून सोडलं… त्याच पडद्यावर मी दिसलो तवा सातार्‍यातल्या दोस्तलोकांनी शिट्ट्या वाजवून थेटर डोक्यावर घेतलंवतं.
…आणि राधिका टाॅकिज ! राधिका म्हन्लं की ‘हिम्मतवाला’ आठवतो, ‘कर्मा’ आठवतो… आखरी रास्ता, जांबाज, मैने प्यार किया, हम आपके है कौन, डर पासून सत्या, रंगीला, मुन्नाभाई…लै लै लै काय-काय आठवतं ! राधिका लै जगली… पण शेवटी ‘बाजीराव मस्तानी’चा हाऊसफुल्ल शो दाखवून तिनंही शेवटचा श्वास घेतला…
..सातार्‍यातल्या मल्टीप्लेक्सच्या झगमगाटात पहिल्यांदा मला थोडंसं उपर्‍यासारखं वाटलं. कुठं सातारी माज दिसला नाय. सगळे शांत-सभ्य इस्त्री केलेल्या चेहर्‍यानं फिरत होते.. दबक्या आवाजात बोलत होते. हिरो पडद्यावर दिसला की सनसनीत शिट्टी ऐकू आली नाय… इंटरव्हलला पाॅपकाॅर्न मध्ये सगळे फ्लेवर होते, पण त्यावेळच्या खारे शेंगदाणे-फुटाण्यांची चव नाही सापडली…
किरण मानेंच्या वर्कफ्रंटबाबत बोलायचं झालं तर काही दिवसांपूर्वी ‘रावरंभा’ चित्रपटातून ते प्रेक्षकांच्या भेटीला आले होते. या चित्रपटात त्यांनी हकीमचाचा ही भूमिका साकारली होती. आता किरण माने लवकरच एका नव्या मालिकेतून प्रेक्षकांच्या भेटीला येणार आहेत. ‘सिंधुताई…माझी माई’ या मालिकेत ते महत्त्वाची भूमिका साकारणार आहेत. या मालिकेत ज्येष्ठ समाजसेविका सिंधुताई सपकाळ यांचा जीवनपट उलघडणार आहे. ही मालिका कलर्स मराठीवर १५ ऑगस्टपासून सुरु होणार आहे.
