मराठी मनोरंजनसृष्टीतील लोकप्रिय अभिनेता म्हणजे अक्षय केळकर. बिग बॉस मराठीच्या चौथ्या पर्वातून अक्षय घराघरात पोहचला. या पर्वात त्याने विजेतेपद पटकावले. अक्षय काही ना काही कारणाने नेहमीच चर्चेत असतो. निरनिराळे फोटो आणि व्हिडीओ पोस्ट करत तो चाहत्यांना अपडेट देत असतो. आता अक्षय एका नव्या कारणामुळे चर्चेत आला आहे.
हेही वाचा- ठरलं तर मग : संतापलेल्या अर्जुनला सायली ‘असा’ देणार धीर, मालिकेत बहरणार दोघांचं नातं, पाहा प्रोमो
अक्षयने मुंबईत स्वत:च घर घेतलं आहे. म्हाडाच्या लॉटरीमधून अक्षयला हे घर मिळालं आहे. इन्स्टाग्रामवर व्हिडीओ पोस्ट करत अक्षयने ही आनंदाची बातमी दिली आहे. व्हिडीओमध्ये अक्षयच्या नवीन घराची झलकही बघायला मिळत आहे. हा व्हिडीओ शेअर करत अक्षयने लिहिलं “माझं पहिलं घर – ते ही मुंबईत !!!! २०२३ मध्ये सगळ्या सुंदर गोष्टी आयुष्यात घडल्या, त्यातली खूप सुंदर आणि अत्यंत महत्त्वाची गोष्ट म्हणजे, मुंबईत माझं स्वतःच “घर” !!! काही वर्षांपूर्वी जेव्हा या क्षेत्रात काम करायला सुरुवात केली, तेव्हा माझ्या ५ मित्रांसोबत, म्हाडाच्या बिल्डिंग मध्ये रूम शेअर करून भाड्याने राहत होतो. त्याच म्हाडाच्या मुंबईच्या प्रकल्पामध्ये या वर्षी अर्ज केला होता आणि सोडतीमध्ये विजेता ठरलो! स्वप्नवत आहे पण, मला हवा तसा view मिळाला आहे. ज्यातून मी रोज चमकणाऱ्या, धावणाऱ्या मुंबईला बघू शकतो.”
अक्षयने पुढे लिहिलं “सगळी जमवाजमव, कागदपत्र, loan, तयारी आणि खूप मोठी, किचकट पण हवीहवीशी procedure… म्हाडाच्या सर्व अधिकारी आणि कर्मचाऱ्यांना मनापासून धन्यवाद! ही सगळी procedure पार पाडताना तुमची खूप मदत मिळाली आणि तुमच्यातला posotive approach खरोखर कौतुकास्पद आहे. तुमच्या साथीमुळे घराचा आनंद द्विगुणित झाला. तर, आज माझ्या घराची चावी हातात आली! या वर्षाची सुरुवात आणि शेवट दोन्ही “विजेता” अशी होते आहे, ही मालिका या पुढे अशीच सदैव सुरू राहू दे. तर अश्या प्रकारे, मुंबईत स्वतःच घर झालं! Extremely happy to share that, I Bought my first house in Mumbai”
यापूर्वी अक्षय त्याच्या आई आणि बहिणीबरोबर कळव्यात राहत होता. कळव्याचे घर सोडतानाचा अक्षयने व्हिडीओ शेअर करत एक भावनिक पोस्टही लिहिली होती. व्हिडीओ पोस्ट करत अक्षयने, “आम्हाला तुझी खूप आठवण येईल, पुन्हा एकदा, बाय कळवा घर”, असं लिहिलं होतं. या पोस्टवरून अक्षय नवीन घरात शिफ्ट होणार असल्याची चर्चा रंगली होती. अक्षय केळकरने काही महिन्यांपूर्वी म्हाडाच्या मुंबई मंडळाच्या घरासाठी अर्ज केला होता. पहाडी गोरेगाव आणि मागाठाणेमधील घरांसाठी एकूण तीन अर्ज भरले होते. आता म्हाडाच्या लॉटरीमधून अक्षयला हक्काच घर मिळालं आहे.
अक्षयच्या कामाबद्दल बोलायचं झालं तर बिग बॉसमध्ये येण्याअगोदर अक्षयने अनेक हिंदी मालिकांमध्ये काम केलं होतं. तसेच ‘दोन कटिंग’ या वेब फिल्ममध्येही तो झळकला होता. या वेबसीरिजमध्ये त्याच्याबरोबर समृद्धी केळकरची मुख्य भूमिका होती.
