न्यू माहीम शाळा बंद प्रकरण : पालकांसोबत आता मराठी भाषा केंद्राचाही विरोध…

न्यू माहीम शाळेचे सुमारे सात – आठ वर्षांपूर्वी नूतनीकरण करण्यात आले होते. त्यामुळे अल्पावधीतच शाळा धोकादायक असल्याचे घोषित केल्यामुळे पालक संतप्त झाले आहेत. तसेच, यासंदर्भात शाळेबाहेर कोणतीही नोटीस लावण्यात आली नाही. या शाळेत शिकणाऱ्या मराठी, हिंदी, कन्नड आदी माध्यमांतील सुमारे दोन हजार विद्यार्थ्यांचे दूरच्या अन्य शाळांमध्ये स्थलांतर करण्यात येणार आहे. त्यामुळे विद्यार्थ्यांना प्रचंड पायपीट करावी लागण्याची शक्यता आहे. याच परिसरातील पालिकेच्या मोरी रोड माहीम शाळेची इमारत पुनर्बांधणीच्या नावाखाली तीन वर्षापूर्वी पाडण्यात आली. मात्र, अद्याप तिचे बांधकाम झालेले नाही.

त्यामुळे न्यू माहीम शाळाही कोणाच्या तरी आर्थिक हितासाठी पाडण्यात येत असल्याचा आरोप केला जात आहे. तसेच, या शाळेच्या पाडकामास विरोध करणारे नागरिक व पालकांना आता मराठी अभ्यास केंद्रानेही पाठिंबा दिला आहे. शाळा बंद करण्याचा निर्णय कोणाचा याचा शोध घेण्यात येईल, असे शालेय शिक्षण अभ्यास व कृती समितीने सांगितले. नुकतेच शालेय शिक्षण अभ्यास व कृती समितीचे प्रमुख डॉ. दीपक पवार आणि अभिनेत्री व मराठी शाळांच्या सदिच्छादूत चिन्मयी सुमीत यांनी शाळेला भेट देऊन पाहणी केली.

शालेय शिक्षण अभ्यास व कृती समितीच्या हिंदी सक्ती विरोधातील चळवळीतील कार्यकर्त्या ऑड. बालुशा माने यांनीही नुकतीच शाळेला भेट दिली. शाळेची संपूर्ण इमारत अत्यंत सुंदर, स्वच्छ व प्रशस्त असल्याचे त्यांनी सांगितले. तसेच, शाळेच्या भिंतींना कुठेही तडा गेलेला नाही. सुस्थितीत असलेली न्यू माहीम शाळा पाडू नये, असेही त्यांनी नमूद केले.

पुन्हा संरचनात्मक तपासणीची मागणी

न्यू माहीम शाळा पाडल्यानंतर पुन्हा तेथे शाळा बांधली जाईल की नाही याबाबत शंका व्यक्त केली जात आहे. शाळा इमारतीचे संरचनात्मक तपासणी केल्यांनतर १७ डिसेंबर २०२४ रोजी शाळेची इमारत ‘सी – १’ श्रेणीत समाविष्ट करण्यात आली होती. मात्र, या अहवालावर प्रश्नचिन्ह निर्माण करण्यात आले आहे. शाळेची इमारत न तोडता पुन्हा संरचनात्मक तपासणी करावी, अशी मागणी करण्यात आली आहे. यासंदर्भात आम आदमी पक्षाने पालकांच्या स्वाक्षरीसह शाळा पाडू नये या मागणीचे निवेदन महापालिका आयुक्त भूषण गगराणी यांना दिले आहे.

शाळेची इमारत सुस्थितीत असून वापरासाठी पूर्णपणे सुरक्षित आहे. शाळा धोकादायक असल्याचे सांगून ती बंद पाडून त्याजागी मोठमोठे टॉवर उभारण्याच्या घटना यापूर्वी घडलेल्या आहेत. न्यू माहीम शाळेचा राजकारण आणि विकासकांमुळे बळी जात आहे. आम आदमी पक्षाच्या प्रणाली राऊत यांनी शाळा वाचविण्यासाठी उभे केलेल्या आंदोलनाला शालेय शिक्षण अभ्यास व कृती समिती खंभीर पाठिंबा देणार आहे. – डॉ. दीपक पवार, शालेय शिक्षण अभ्यास व कृती समितीचे प्रमुख

This quiz is AI-generated and for edutainment purposes only.

न्यू माहीम शाळेची इमारत सुस्थितीत आहे. भिंतीचे पोपडे निघणे किंवा गळतीच्या समस्या असू शकतात. त्या प्रत्येक इमारतीत असतात. त्यांची डागडुजी केली जाऊ शकते. मात्र, त्यासाठी शाळा पाडण्याची आवश्यकता नाही. पालिकेच्या शाळेत गरीब, मागास प्रवर्गातील विद्यार्थी शिक्षण घेतात. त्यांचे पालक प्रशासनाच्या या मनमानी कारभाराला विरोध करणार नाहीत, म्हणून त्यांच्या माथी काहीही मारणार का? भविष्यातील भारताचे नागरिक असणाऱ्या विद्यार्थ्यांचा प्रशासनाने खेळ करू नये. – चिन्मयी सुमीत, प्रसिद्ध अभिनेत्री व मराठी शाळांच्या सदिच्छादूत