मुंबई : पंतप्रधान नरेंद्र मोदी यांच्या ७५ व्या वाढदिवसानिमित्त राज्य परिवहन (एसटी) महामंडळाच्या प्रमुख ७५ बसस्थानकांवर सर्वसामान्य नागरिकांसाठी मोफत वाचनालय सुरू करण्यात येणार आहे, अशी घोषणा परिवहन मंत्री तथा एसटी महामंडळाचे अध्यक्ष प्रताप सरनाईक यांनी केली.
पंतप्रधान नरेंद्र मोदी यांचा वाढदिवस १७ सप्टेंबर रोजी आहे. त्यांच्या वाढदिवसानिमित्त देशभरात विविध उपक्रम राबविण्याचे नियोजन करण्यात आले आहे. महापुजेचे आयोजन, नरेंद्र मोदी यांच्यावर आधारित पुस्तकांचे प्रकाशन केले जाणार आहे. खासदार श्रीकांत शिंदे व भारतीय जनता पक्षाचे ज्येष्ठ नेते विनय सहस्रबुद्धे यांच्या संकल्पनेतून पंतप्रधान नरेंद्र मोदी यांच्या ७५ व्या वाढदिवसाचे औचित्य साधून यावर्षी एसटीच्या प्रमुख ७५ बसस्थानकांवर परिसरातील सर्व सामान्य नागरिकांसाठी मोफत वाचनालय सुरू करण्यात येईल.
या वाचनालयात मराठी भाषेतील वि.स. खांडेकर, वि.वा. शिरवाडकर (कुसुमाग्रज), कवी नारायण सुर्वे, पु.ल. देशपांडे, नामदेव ढसाळ, भालचंद्र नेमाडे, शंकर पाटील, व.पु.काळे, विश्वास पाटील यांसारख्या लोकप्रिय साहित्यिक, कवी यांची पुस्तके ठेवण्यात येतील. ही पुस्तके संबंधित बसस्थानकावरील एसटी कर्मचाऱ्यांकडे नोंद करून नागरिक आपल्या घरी वाचनास घेऊन जाऊ शकतात व वाचन करून परत आणून देऊ शकतात, अशी माहिती मंत्री सरनाईक यांनी दिली.
महाराष्ट्र लोकसेवा आयोग व केंद्रीय लोकसेवा आयोग या स्पर्धा परीक्षांची तयारी करणाऱ्या विद्यार्थ्यांसाठी काही मौलिक संदर्भ ग्रंथ या फिरत्या वाचनालयामध्ये उपलब्ध करून दिले जातील. ही सर्व सेवा मोफत असेल. तसेच स्थानिक वृत्तपत्रे दररोज उपलब्ध करून दिली जातील. त्यामुळे मराठी भाषेचा समृद्ध वारसा चालवणारा वाचन कट्टा बसस्थानकाच्या परिसरात निर्माण होईल, असे मंत्री सरनाईक यांनी सांगितले.
उपमुख्यमंत्री एकनाथ शिंदे यांनी दिलेल्या निर्देशानुसार मराठी भाषेला अभिजात दर्जा मिळवून देणाऱ्या पंतप्रधान नरेंद्र मोदी यांच्या वाढदिवसाच्या निमित्ताने प्रत्येक विभागामार्फत लोकाभिमुख उपक्रम सुरू करण्यात येत आहेत. याचाच एक भाग म्हणून मराठी साहित्याचा प्रचार आणि प्रसार करणारा वाचन कट्टा एसटीच्या बसस्थानकांवर सुरू करून अनमोल भेट या निमित्ताने जनतेला आम्ही देत आहोत. – प्रताप सरनाईक, परिवहन मंत्री तथा अध्यक्ष, एसटी महामंडळ.
