मुंबई : सीमाशुल्क विभागाने मुंबई विमानतळावर केलेल्या कारवाईत सव्वासात कोटी रुपयांच्या हायड्रोपोनिक गांजासह प्रतिबंधीत औषधे जप्त केली. चार विविध कारवायांमध्ये चार आरोपींना अटक करण्यात आली असून त्यांच्याविरोधात अमली पदार्थ प्रतिबंधक कायद्याअंतर्गत गुन्हा दाखल करण्यात आल्याची माहिती सीमाशुल्क विभागाने दिली.
मुंबई विमानतळावर सीमाशुल्क विभागाने केलेल्या कारवाईत एकूण ७ किलो ३१८ ग्रँम हायड्रोपोनिक गांजा व १०० मि.ली. क्षमतेच्या कोडीन फॉस्फेट असलेल्या ९९ खोकल्याच्या औषधाच्या बाटल्या जप्त केल्या आहेत. या चार प्रकरणांमध्ये एकूण चार प्रवाशांना अटक करण्यात आली आहे.
बँकॉकहून तस्करी
पहिल्या कारवाईत संशयाच्या आधारावर सीमाशुल्क अधिकाऱ्यांनी बँकॉकहून मुंबईत आलेल्या एका प्रवाशाला छत्रपती शिवाजी महाराज आंतरराष्ट्रीय विमानतळावर थांबवले. त्याच्या ट्रॉली बॅगेतून ६१० ग्रॅम हायड्रोपोनिक गांजा जप्त करण्यात आला. प्रवाशाला एनडीपीएस कायदा, १९८५ अंतर्गत अटक करण्यात आली. दुसऱ्या कारवाईतही हायड्रोपोनिक गांजा जप्त करण्यात आला. बँकॉकहून आलेल्या दुसऱ्या प्रवाशाच्या बॅगेतून ५२५६ ग्रॅम हायड्रोपोनिक गांजा जप्त करण्यात आला. या प्रकरणातही प्रवाशाला अटक करण्यात आली. तिसऱ्या कारवाईत सीमाशुल्क विभागाला गुप्त माहिती मिळाली होती. त्या आधारावर बँकॉकहून आलेल्या प्रवाशाच्या ट्रॉली बॅगेतून १४५२ ग्रॅम हायड्रोपोनिक गांजा हस्तगत करण्यात आला. आरोपीला अटक करण्यात आल्याची माहिती अधिकाऱ्याने दिली.
आखाती देशात जाणाऱ्या प्रवाश्याला अटक
चौथ्या कारवाईत सीमा शुल्क विभागाने रियाधला जाणाऱ्या एका प्रवाशाच्या बॅगेत कोडीन फॉस्फेटयुक्त ९९ खोकल्याच्या औषधाच्या बाटल्या सापडल्या. या औषधाचा वापर नशेसाठीही केला जातो. संबंधित प्रवाशाला अटक करण्यात आली आहे.
पर्यटनाच्या नावाखाली गांजा तस्करी
दक्षिण अमेरिका खंडातील देशांमध्ये मोठ्या प्रमाणात गांजाची निर्मिती करण्यात येते. त्यानंतर विविध मार्गांनी जगभरात त्याचे वितरण करण्यात येते. गेल्या काही महिन्यांपासून बँकॉक मार्गे मोठ्या प्रमाणात गांजाची तस्करी केली जात असल्याचे निदर्शनास आले आहे. भारतातून थायलंडमध्ये मोठ्या प्रमाणात पर्यटक येत-जात असतात. त्यामुळे या मार्गावर मोठ्या प्रमाणात विमानांची उड्डाणे होतात. परिणामी, बँकॉकमार्गे भारतात गांजाची तस्करी करण्यात येते. ६ महिन्यात १०० कोटींहून अधिक किमतीचा गांजा जप्त करण्यात आला आहे. या तस्करीत थायलंडमधील भारतीय तस्करांचा सहभाग असल्याची प्राथमिक माहिती आहे. तेथे गांजा विक्रीला परवानगी असल्यामुळे आरोपी आता बँकॉकहून गांजाची तस्करी करीत आहेत. हायड्रोपोनिक गांजा महाग असल्यामुळे त्याच्या तस्करीत वाढ झाल्याचे अधिकाऱ्याने सांगितले.
